Biento fuerte a ranca dak di tribuna na Flatstone Ballpark

ORANJESTAD (AAN): E dianan aki, rafaga di biento den dia por ta entre 40 y 50 km/h.

  E sistema di presion riba Oceano Atlantico ta sigui ocasiona biento fuerte den Caribe.

   Biento pisa a pasa ranca y dobla dos pida grandi di zink riba e tribuna di Flatstone Ballpark, cu ta situa na Piedra Plat.

   Un ciudadano cu tabata eybanda, a mira e dak ta tril y el a logra usa su smartphone pa graba e momento net cu e dos pida dak aki a wordo ranca y dobla.  Dos persona cu tabata para e momento ey cerca di e edificio, a haya nan ta ranca un careda core bay pa evita cu esaki lo por bin dal riba nan.

   E pronostico pa awe ta sigui cu biento fuerte, y lama tambe lo ta tiki bruto cu ola di entre 3 y 7 pia, y na costa nort di Aruba, e olanan lo ta aun mas fuerte.