Biblioteca tin un rol importante den e trabaonan di digitalisacion di e servicionan di gobierno

Premier Evelyn Wever-Croes:

ORANJESTAD (AAN):  Prome Minister Evelyn Wever-Croes tabata un invitado special durante e ceremonia di celebracion di 75 aña di Biblioteca Nacional.

            DIARIO a entrevista e mandatario kende a expresa cu un biblioteca den tur pais ta un instituto hopi importante y ta un centro caminda tin hopi conocemento y hende ta yega pa haya mas conocemento. "Biblioteca Nacional a demostra esey na Aruba tambe cu 75 aña di existencia", a bisa.

            Tin cu enfoca riba e trabao grandi cu a wordo haci pero tambe e trabaonan futuro. Mi ta mira cu biblioteca tin un rol den e trabaonan di digitalisacion di servicionan di gobierno. Mas y mas gobierno ta bay digitalisa y awo caba pa haya paspoort tin cu aplica online y no tur hende tin computer, acceso of sa con pa hacie. Den e caso aki biblioteca tambe ta yuda nan.

            Premier Wever-Croes a declara cu eynan e ta mira un papel hopi importante cu biblioteca ta haci caba pa yuda tambe den e servicionan aki cu mas y mas ta bay digitalisa.

            Biblioteca ta un lugar unda e hendenan ta sinti nan mes safe, caminda por haya un bon servicio, un ambiente hopi calido ora di drenta den e edificio. Por mira con a cambia e entrada y a hacie un luga calido y ameno. Esey sigur lo contribui na mas hende cu kier acudi biblioteca.

            "Pa mi ta un honor pa ta akinan pa celebra cu nan mas cu ta un rato pa gradici nan, pasobra e trabao y e importancia di e instituto no ta di un edificio ta di e hendenan cu ta traha den dje. Cu a traha, cu ta trahando y cu lo bay traha.

            Mi a gradici nan den nomber di gobierno di Aruba pa e trabao, e dedicacion, e pasion cu nan ta haci nan trabao y ohala cu Dios bendiciona nan pa nan por sigui hacie", Prome Minister a finalisa bisando.