Biblioteca Nacional di Aruba a celebra 75 aña di inspiracion y conocemento

Un tesoro invaluabel pa e comunidad...

ORANJESTAD (AAN):   Diamars mainta a celebra un momento historico pa Aruba ora cu a celebra 75 aña di existencia di Biblioteca Nacional di Aruba. Tabata un momento masha bunita pa mira con e empleadonan y tambe algun persona cu a caba a bay cu pension, a reuni den e sala di exposicion pa desayuna hunto y refleha riba e añanan aki y loke e institucion ta significa pa un isla manera Aruba.

            Directora di Biblioteca Nacional, Sra. Astrid Britten a habri e mainta cu un discurso hopi elocuente y emotivo relaciona cu e funcion importante di biblioteca.  Siguientemente, Prome Minister Sra. Evelyn Wever-Croes, representando su colega minister encarga cu e cartera di enseñanza, Sr. Endy Croes, tambe a expresa palabranan bunita celebrando e momento importante aki.

            Asina e mainta a continua cu un serie di presentacion y videonan entre nan un video di Sra. Betty Goeloe durante un actividad di Conta Cuenta na Casnan di Anciano. Un presentacion di Sra. Britten y Sra. Zetsia Ponson riba e 75 aña di conocemento: un recorido historico di trabao di biblioteca na Aruba.

            Banda di esaki tambe a haci un lansamento oficial di e logo nobo di BNA haci door di Sra. Gina Jie-Sam-Foek. A presenta e proyecto di poema riba glas, cual ta un serie di poemanan di poetanan clasico y contemporaneo cu ta wordo exhibi riba algun di e bentananan y murayanan di biblioteca.

            Finalisando cu e mainta a presenta e proyecto nobo di e sala di estudio y su inauguracion haci door di Sra. Yosmar Sneek y su team.

            Como acto di celebracion, a corta bolo y cada empleado a ricibi un bunita regalo en conexion di e celebracion di 75 aña di biblioteca.

            Mester menciona pa loke tabata e resto di dia, Biblioteca Nacional a habri bek pa publico y na tur tres localidad, George Madurostraat, Arubiana/Caribiana y San Nicolas, a parti cuki pa tur bishitante.