Biblioteca Nacional cu festividad grandi pa mucha y adulto  riba 26 di Augustus

Despues di dos siman di actividadnan exitoso:

ORANJESTAD (AAN) – Glenda Zavala-Maduro, funcionario di Biblioteca Nacional Aruba, ta e empleado cu ta organiza actividadnan infantil riba Diamars, y diferente dia den e luna.

            Den entrevista cu DIARIO, e dama a reitera cu e luna aki e actividad a cuminza cu e buki di pret, cu a tuma dos siman completo; un siman na Playa y otro na San Nicolas. Durante e evento aki, e muchanan a conta nan mes historia y a traha nan mesun buki.

            Despues a bin cu e proyecto “Biblioteca den bo bario” unda a scoge tres bario, esta Rancho, Bubali, y e siman aki tabata den Bario di Dakota unda a conta historia di e bario y Miss Aruba tambe a bin conta storia pa e muchanan.

            Señora Zavala a expresa cu pa Biblioteca Nacional no ta asina importante e cantidad si muchanan sin cu nan ta treciendo e mensahe pa e bario di unda e mucha ta. E mensahe pa lesa buki, sa kico ta conta cuenta, haci teatro, canta. “E ta un ora, pero un ora di alegria, gozo pa e muchanan, y e muchanan ta disfruta di dje.

            Zavala a menciona cu Biblioteca ta bezig cu un par di trabao, por ehemplo e “books start” cu, eigenlijk, a cuminza algun luna pasa unda cu e muchanan chikito, di 0 pa 2 aña ta bira miembro di Biblioteca y a cambio nan ta ricibi un regalo cu ta un tas cu un buki den dje. Esaki ta un proyecto cu a bin for di Hulanda cu Biblioteca ta bay cuminza promove, mas tanto posible entrante aki dos siman, cu ta bay cuminza cune. Tambe den Luna di November Biblioteca tin  su Siman di Buki.

            No solamente pa mucha Biblioteca tin proyecto, pero tambe pa hende grandi. Por ehemplo, dia 26 di augustus aki, Biblioteca tin un fiesta di bario na BNA mes, cu presentacion  di seis grupo tipico cu lo bin demostra nan musica.

            El a comenta cu e mes no tabata sa, pero aki na Aruba tin tipiconan cu ta toca cu acordeon, viol, y diferente instrumento.

            Un biaha mas, lo pone tentnan pafo pa personanan cu ta interesa di bende nan productonan local. Tambe lo tin un grupo di baile y cah’i orgel. E actividad aki lo cuminza pa 6 or di atardi, y asina sucesivamente BNA ta bay traha tanto pa mucha como pa hende grandi. Esaki ta BNA su meta!