Biblioteca Nacional Aruba a haci lansamento oficial di e buki: 'Capital Humano: Entre buki y arte'

Den cuadro di 75 aña di trabao:

*Un tesoro di herencia visual 

ORANJESTAD (AAN):    Den cuadro di e celebracion di 75 aña di trabao di Biblioteca Nacional Aruba, diahuebs anochi a keda lansa oficialmente un tremendo produccion den forma di buki bao e nomber 'Capital Humano: Entre buki y arte'.

            Durante un actividad di kita sombre na Biblioteca Nacional Aruba na George Madurostraat 13 un publico hopi special tabata testigo di e lansamento original di e buki aki.  Directora Sra. Astrid Britten a habri e anochi expresando cu esaki tabata un oportunidad pa celebra conocemento.

            El a probecha pa yama bonbini na miembronan di Parlamento, Sra. Xiomara Maduro, Sr. Gino Goeloe, curator di e publicacion Sra. Maria Teresa Madariaga, diseňador grafico Sr. Dennison Abrahams, artista, escritor, poeta, colega- y amigonan.

            Sra. Britten a laga sa cu e buki aki ta e celebracion di nan coleccion nacional di arte cu ta un coleccion valioso di Pais Aruba.

            "E buki aki mas cu un catalogo. E ta un testament di e spirito creativo cu ta cuminsa den historia di nos nacion. Un spirito cu ta wordo expresa a traves di verf, ink, escultura, impresion, fotografia y cuidadosamente conserva dentro di e murayanan aki", el a expresa.

            Pa generacionnan Biblioteca Nacional Aruba a para como un wardado, no solamente di palabranan, pero di imagennan, ideanan y imaginacion. E obranan cu ta aparece riba e buki aki, algun iconico, algun rara bes mira y conoci ta refleha e bos y visionnan diverso cu a forma e paisahe cultural, e directora di BNA a agrega.

            E coleccion di arte aki ta conta storianan cu ta profundamente humano, bunita, compleho y significante.

            Astrid Britten a indica cu e publicacion no lo tabata posibel sin e dedicacion di e curator, bibliotecario, historiador, fotografo, diseňador- y redactornan, kende cu nan trabao incansabel a trece claridad y bida na cada pagina.

            E publicacion no tabata posibel sin e artistanan, kende nan obranan ta sigui inspira y desafia. "Mi ta spera cu e buki bira un tesoro pa studiante, artista y pa cualkier hende cu ta busca un comprondemento mas profundo di nos herencia visual.

            Laga e publicacion aki inspira futuro generacionnan pa explora, pa crea y pa mira mundo cu wowonan fresco", Sra. Britten a finalisa bisando.

            E buki 'Capital Humano: Entre buki y arte' ta un compilacion di arte di e siguiente artistanan: Theo Brinkman, Belinda De Veer, Luis Alonso Castaňo Benjumea, Nelson Gonzalez, Danilo Geerman, Natusha Croes, Maria La Torre, Samuel Sarmiento, Wouter Van Romondt, J.C. Lampe, Stan Kuiperi, Ciro Abath, Eef van der Straten, Elvis Tromp, Olga Van Bochove, Gina Jie Sam Foek, Gustave Nouel, Vanessa Paulina, Jenny Kock, Irene Peterson, Maritza Erasmus, King Lie Kwie, Elvis Lopez, Piet Verwoord, Alida Martinez, J. Donati, Armando Goedgedrag, Elisa Lejuez, Romelinda Maldonado, Cado de Lannoy, Ephraim R. Britten y Nigel Matthew.

            Tambe ta inclui un seccion special cu ta 'The Hartog Collection": Pandellis, Evelino Fingal y Gerard E. Alers.