Biblioteca a haya 2 ehemplar regalo di e buki ‘Virginia: een Afefe verhaal’

ORANJESTAD (AAN):   Autora Ida Does y ilustrador Daniëlle Nijboer a pasa na Biblioteca Nacional Aruba e siman aki pa presenta e buki ‘Virginia: een Afefe verhaal’.

Biblioteca a haya 2 ehemplar regalo for di sra. Does. E team di produccion pa ‘Afefe stories’ ta Ida Does, Daniëlle Nijboer, Ellen-Rose Kambel y Joan Windzak. E buki ‘Virginia’ ta e prome den un serie di ‘Afefe stories’.

            Esaki ta un variacion creativo basa riba e storia di bida di e catibo femenino, Virginia. Investigadornan a haci bastante research pa haya sa mas di e bida di catibo na Aruba y un di nan cu a resalta y a inspira hopi ta, Virginia.

            Virginia ta anhela su libertad mas cu tur cos. E ta kere cu e tin derecho di ta liber y ta lucha pa esaki pero al mismo tiempo e tin cu soporta castigo y sota. E ta desea di ta liber manera un parha cu ta bula halto. Bula y bou su halanan un biento fuerte. Biento Afefe ta sinti Virginia su deseo y ta dicidi di yud’e.

            Esaki ta un storia pa mucha, skirbi na Hulandes. Mucha for di 10 aña bay ariba mes por lesa e texto. Mucha mas chikito mester poco ayudo di nan mayor den e lesamento. E buki a keda publica na september 2023 cu ISBN 9789045128528.

            Ida Does-Chin-A-Loi a nace na Paramaribo, 4 juli 1955 y ta un periodista, escritora y productora di documentario. Cu su documentarionan ela gana premio na Canada, Hulanda, Trinidad y Tobago, Merca y Belize. E ta conoci pa su documentario ‘Poetry is an island - Derek Walcott’ cu poeta Derek Walcott. Na 2014 a presenta e documentario aki Cas di Cultura.