Tur cabayero ta keda cordialmente invita:
ORANJESTAD (AAN) Den entrevista cu Matutino DIARIO, señora Betina Maduro, ken ta parti di CEDEHM como Coach den e area di Sexualidad, Famia, Andropause y Post-menopause, el a anuncia un charla dirigi na hende homber.
Dia 12 di November anochi, na MFA Santa Cruz, e ta bay papia tocante Andropause, y na prome lugar el a haci un invitacion na tur cabayero, esnan di 30 aña bay ariba, Adultonan di mas edad, y esnan mas jong, pa asisti y haya informacion relevante.
El a splica pa adelanta un tiki so, cu e hormone di hende homber, testosterone, e ser masculino di 30 aña ya caba ta cuminza perde 1% tur aña.
“Cu 30 aña bo ta basta jong y ta bon pa bo educa bo mes. Anto e anochi ey tin diferente orado, anto bo por relata bo mes cu un di oradornan, tocante kico nan ta bay papia. Ami ta bay papia tocante Andropause”, señora Maduro a reitera.
E dama a señala cu locual e ta ripara ta cu na Aruba, actualmente, ta papiando hopi riba Menopause y e ta hopi contento cu ta duna mas enfoke na esaki, pasobra antes hopi ser femenino tabata haya cancer na matriz, pero awo a bira cu hopi hende homber ta hayando cancer na prostaat.
“Mi ta wak’e caba y p’esey mi ta cuminza haci charlanan riba Andropause. E Menopause, lamentablemente, ta manera un trend aworaki, pero mi ta mira cu esey ta bay bira un cambio cu ta drenta, anto Andropause ta bay ta e topico cu aki un aña ta bay papia mas di dje cu mas informacion”, segun señora Maduro a indica.
El a señala cu haci control mas trempan posible, ta miho pa hende homber y tambe pa hende muher. “Haci control di prostaat algo standard cu bo tin cu haci tur aña, bo por haci’e den sanger y na diferente manera”, señora Maduro a indica.
El a agrega cu e anochi informativo aki ta completamente gratis. “E no ta costa bo nada pa bo scucha, anto tambe habri bo mente pa cierto cosnan cu kizas bo ta pasa aden, cu bo por pak aan tambe, of bo ta haya nos eynan tambe cu bo por haci nos pregunta”, señora Betina Maduro a indica.
