Minister Geoffrey Wever:
- El a splica esaki na UFA y Comision pro Cunukeronan
ORANJESTAD (AAN) Den entrevista cu Matutino DIARIO, Minister di Economia, Finanzas y Sector Primario, señor Geoffrey Wever, a duna di conoce cu el a reuni cu Comision Pro Cunukeronan y cu United Farmers Aruba (UFA), y el a splica nan cu Agri Innovation Park mester desaroya banda di tur loke ta andando den e sector primario.
“Agri Innovation Park ta un parke unda cu tur hende por participa. Mi ta kere tin un mal interpretacion, unda ta kere cu nos ta exclui nos agricultornan locual no ta e caso. Na e momento aki, nos ta den e diseño tecnico, pues ki tipo di tecnologia lo wordo uza, ki tipo di pomp, temperatura, etc., y ki tipo di ‘green houses’, traha e mapa, e beschikking y un ‘Economic Feasibility Studie’ y asumiendo cu esakinan ta positivo, y por traha un green house pa construccion di e parke e ora ey nos lo cuminza tambe cu e proceso di habri pa e participacion den e parke”, Minister Wever a indica.
El a agrega cu e idea ta cu nos agricultornan local aplica pa esey y por haya un spot den e “Agri Innovation Park”. El a señala si, cu no tur hende por haya un spot den dje pasobra cuponan ta limita.
“Pero e idea ta cu un persona cu ta interesa den agricultura y cu tin un ‘business plan’, cu tin un manera pa haci esaki na un forma factible, e por haya participacion den e proyecto na un forma transparente”, e dignatario a menciona.
El a splica, por ehemplo, na United Farmers cu por ta un persona cu aworaki ta activo caba den agricultura tradicional, manera un persona cu e conoce cu ta planta patia cu melon, pues e tin afinidad caba; kizas e ta interesa na drenta den e Agri Innovation Park, y e ta keda haci su parti tradicional cu tin, y e ta haya un lugar den e parke.
“E por ta un hoben cu a caba Colegio EPI, cu tin gana di bay den agricultura y ta bin cu un bon idea, nos ta yud’e cu e tecnologia y e sosten, pa e por pone su mesun negoshi den e Innovation Park”, Minister Wever a subraya.
