Bestaansminimum di Maart a baha cu 7 Florin compara cu e luna anterior

ORANJESTAD (AAN): E siman aki, Oficina Central di Estadistica (CBS) a emiti nan relato cu ta encera e Indice di Prijs di Consumo pa luna di Maart 2023. 

E indice di CPI aki ta hopi importante pa comunidad y Gobierno sa con inflacion ta bayendo.

   Tambe e ta presenta e ‘Bestaansminimum’ pa famia aworaki na Aruba.  E bestaansminimum pa un hogar consistiendo di 2 adulto y dos mucha (edad 0-15 aña) na Maart 2023 ta Afl. 5,386, esey un caida di Afl. 7 compara cu Februari 2023 (Afl. 5.393).

   E bestaansminimum pa un hogar di 1 adulto ta Afl. 2,565, un caida di Afl. 3 compara cu Februari 2023 (Afl. 2,568).

   Loke ta un “Bestaansminimum” y con e ta worde ahusta: CBS ta defini un bestaansminimum como e nivel minimo di entrada cu ta worde percibi necesario pa un persona of famia por funciona den sociedad di un manera adecuado y socialmente aceptabel.

   Ora di usa e definicion “Bestaansminimum”, en realidad ta worde referi na un “Sociaal Bestaansminimum” y no na e definicion literal di un ‘Bestaansminimum’ cu ta referi na “e suma di placa necesario pa cumpra e bienes y servicionan cu ta worde considera necesario pa biba un bida liber di privacionnan basico” (Nacionnan Uni). Un indice a worde crea pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna.

   Cada luna e indice aki ta worde ahusta, a base di e prijsnan di alimento, paña, vivienda, transporte y otro articulonan den e canasta.

   E bestaansminimum actual ta worde basa riba e rapport “Bestaansminimum 2010” publica door di CBS na December 2010, y cual ta worde actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (di 0 pa 14 aña).

   E bestaansminimum ta e nivel minimo di entrada cual ta worde percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta worde determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta worde yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”.

   Escalanan di ekivalencia ta worde usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0-15 aña). E bestaansminimum ta basa riba cifranan di e rapport “Bestaansminimum 2010” cu CBS a publica na December 2010 y ta worde actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di 2 adulto y dos mucha (edad 0-15 aña).

   Compara cu un aña prome: Na Maart 2023 e bestaansminimum mensual pa un hogar cu ta consisti di 2 adulto y dos mucha (edad 0-15 aña) (Afl. 5,386) ta mustra un subida di Afl. 406 compara cu Maart 2022 (Afl. 4,980) y a worde causa principalmente door di subidanan di respectivamente, Afl. 213 y Afl. 175 den e sectornan di “Cuminda y bebida no-alcoholico” y “Vivienda”.

   Na Maart 2023 e bestaansminimum mensual pa un hogar cu ta consisti di un solo adulto ta Afl. 2.565, cual ta representa un deficit di entrada di Afl 672, un subida di Afl. 115 compara cu e deficit observa un aña pasa (Afl. 557). E deficit aki ta e di mas halto registra den un periodo di 6 aña pa luna di Maart.