Benta di Royal Plaza na PANA Group VBA a bira un realidad

Royal Plaza Mall lo bira Casa Playa

ORANJESTAD (AAN): Recientemente, sr. Alberto Perret-Gentil di PANA Group VBA y Sr. Yair Liechtenstein representando e bendedonan di Royal Plaza, a firma e traspaso iconico di Royal Plaza Mall cu awor lo wordo converti den CASA PLAYA, un proyecto di uzo mixto cu varios tienda comercial. E pisonan ariba lo wordo transforma den 62 condominio luhoso cu lo tin un bista impactante riba e area di waf y Oranjestad. E comodidad lo inclui un gym, biblioteca, valet parking, 24/7 seguridad y su factor impactante lo bira e piscina ‘infinity’ riba e 3er piso cu bista pa Paardenbaai.

            Vivienda den Oranjestad ta keda un topico di discussion, di cual Gobierno di Aruba ta aspira un transformacion urbano pa stimula economia bek den Oranjestad. A haci e prome avancenan den e cayanan di Wilhelminastraat y Weststraat. Por a tuma nota di varios restauracion y revitalisacion di algun cayanan, unda cu ta inclui e aspecto di e economia creativo pa ta un di e vehiculonan di transformacion. CASA PLAYA sigur lo contribui na transformacion di Oranjestad den su totalidad, y lo yuda trece fluho di residente den Oranjestad. E bista compremetedo di e lama cu actividadnan rond di waf ta trece un otro aspecto pa residente y bishitantenan.

            E desaroyadornan cu mas di 23 aña na Aruba a desaroya condominionan luhoso manera Oceania Residences, Blue Residences, Azure Beach Residences y Harbour House Condominium, como tambe internacionalmente manera Merca y Colombia.

            Despues cu e desaroyador a transforma e edificio bandona den Weststraat den un condominio luhoso di Harbour House, por a tuma nota un fluho economico diferente y compremetedor pa e area di Paardenbaai, contribuyendo positivamente na transformacion urbano, y elevando e calidad comercial pa cu e area aki como tambe duna enfasis na su historia pa medio di artenan mural.

            Mester menciona cu ya caba CASA PLAYA a bende varios unidad, cu nos localnan y bishitantenan fiel di Aruba, y ta spera di por yega ‘sold out’ pronto.