ORANJESTAD (AAN) – Diabierna atardi Parlamento nobo di Aruba (periodo 2021-2025), a completa su 21 asiento, na momento cu Benny Sevinger, di fraccion di AVP, a huramenta despues di a pasa un temporada di mas of menos tres luna den prison, relaciona cu e caso Avestruz.
Ora el a duna su declaracion na prensa, pafo di Gabinete di Gobernador, el a gradici Dios na prome lugar, y a expresa cu esey tabata un momento importante den historia cu e cu partido AVP, a pasa aden.
Sevinger a bisa cu el a nace, crece y lanta den un cas unda el a siña cu “nada ta sosode por nada”, cu Dios sa kico e ta haci y cual ta e caminda cu e ta pone pa cada persona cana.
“Awe, nos a tuma un paso importante den e democracia di nos pais; un paso cu no tabata facil pa yega akinan. Un persecusion cu a cuminza añanan anterior, di tempo cu mi tabata minister, cu a concretiza den investigacion y persecusion fisicamente na 2018, cu presentacion di un keho di Partido MEP na Ministerio Publico, y cu nan a keda pone presion te cu OM a dicidi di haci algo”, Sevinger a señala.
El a haci un repaso di locual a sosode for di listramento di su casa seis biaha te su detencion den pleno campaña politico y a expresa cu no ta por nada cu el a wordo deteni den campaña. E lo duna su version den detaye con y pakico esaki a sosode, na momento cu e haya oportunidad pa haci esaki.
Parlamentario Sevinger a reitera cu nan lo no dobla pero e lo sigui traha mas duro cu nunca pa e comunidad aki cu ta den hopi necesidad.
Kabinet di Gobernador tambe a emiti un comunicado di prensa indicando cu riba diabierna 6 di augustus 2021 e ultimo miembro di Parlamento recien nombra, señor O.B. (Benny) Sevinger, a huramenta den presencia di Gobernador di Aruba, Su Excelencia Alfonso Boekhoudt, na Cas Ceremonial di Gobernador.
Señor Sevinger pa e ocasion aki tabata acompaña pa tres miembro di famia.
Foto’s: © Kabinet Gouverneur Aruba
https://diario.aw/categories/noticia/general/benny-sevinger-a-huramenta-completando-asina-e-21-asientonan-den-parlamento-nobo#sigProId68e8784853
