Legalmente AVP ta responsabel di presencia Benny den Parlamento
*Cassatie por scapa Benny di strafkaart Avestruz na tempo?
*E por a participa na eleccion 2021 como acusado sin condena
ORANJESTAD(AAN)—Politica ta e instrumento di democracia na bienestar di e ciudadanonan di un pais. Reglanan democratico ta base di eleccion di gobernantenan cu no ta alcansa poder pa motibo di nan nacemento y herencia familiar of nan poder material.
Democracia ta exigi pa Pueblo por tin un Gobierno cu solamente ta traha na beneficio di Pueblo y hamas ta bay contra e bienestar directo di Pueblo of di hende sigur no pa motibo di nan posicion.
DIARIO for di prome momento a splica Aruba con e caso Avestruz, ta mishi cu tur loke democracia ta encera.
Contenido di e Caso Avestruz basicamente ta e ofensa mas grandi contra democracia cu no ta permiti pa cualkier ciudadano of grupo di comunidad, goza di loke e comunidad por ofrece na un forma exclusivo.
For di prome momento cu oficialmente Ministerio Publico a anuncia e caso Avestruz, a mustra riba e hecho cu aki por papia di un cantidad grandi di miembro di comunidad, cu ta den necesidad pa haya un tereno y no a haya esaki mientras otro personanan lo a haya esaki sin cu a sigui reglanan di oro di ley.
Mester bisa cu Aruba a haci gastonan enorme pa investiga tur e casonan cu finalmente a wordo atende den Corte di Prome Instancia y ultimamente den Corte di Husticia como caso den apelacion di sentencia.
Con importante e figura di Benny Sevinger ta pa partido AVP y sigur Mike Eman como lider di e partido, a bini dilanti na momento cu Mike Eman a exigi pa Benny Sevinger wordo acepta como candidato riba lista di AVP y pa asina Pueblo vota pa Benny Sevinger den Prison.
Aruba a pasa den un momento historico cu Gobernador di Aruba, no a permiti huramentacion di Benny Sevinger como Miembro di Parlamento di Aruba, te na momento cu el a bandona prison.
Su Excelencia Gobernador Boekhoudt a mustra cu for di prison, Benny Sevinger no por a duna contenido na su tareanan como Miembro di Parlamento di Aruba.
E tratamento di Caso Avestruz a resulta den sentencia pa castigo di prison pa Benny Sevinger, cu Mike Eman como lider di AVP publicamente a sigui sostene Benny Sevinger y su estadia den Parlamento, argumentando cu e sentencia di Huez a wordo apela.
Mientrastanto den e caso di apelacion di e sentencia, awor Benny Sevinger a wordo sentencia na un castigo mas pisa dor di Corte di Husticia loke mester a conduci directamente na su retiro di Parlamento di Aruba, no solamente pa motibo moral pero pa e motibo cu ya den pasado DIARIO a presenta pero awor ta trece dilanti como motibo directo pa Benny Sevinger entrega su retiro como Miembro di Parlamento di Aruba, cu segun Corte di Husticia e no por ta como parti di e sentencia.
DIARIO a duna AVP y Mike Eman oportunidad pa tabata sincero cu Pueblo di Aruba, pero un silencio total tabata e contesta di AVP, cu no kier splica Pueblo cu si Benny Sevinger bay Cassatie y keda den Parlamento en espera di otro sentencia, chens ta grandi cu eleccion 2025 ta exigi Benny Sevinger bandona Parlamento.
Diferente cu e caso tabata na 2021, awor Benny Sevinger tin un Strafkaart loke ta haci cu ni sikiera e por ta candidato pa AVP den proximo eleccion cu no ta permiti participacion di un persona cu strafkaart.
Tin un diferencia grandi entre apelacion di un caso cerca Corte di Husticia y Cassatie. Ora un caso bay den Cassatie, no tin un tratamento nobo di parti di Corte Supremo di Husticia, cu solamente ta observa si den e forma cu e caso a wordo atende den Corte den Prome Instancia y den Corte Superior (apelacion), a sigui reglanan di Ley.
Normalmente tratamento di casonan den Cassatie ta tuma nan tempo y e pregunta grandi ta, cu si lo tin un sentencia prome cu den Cassatie e caso termina.
E pregunta ta bira pues, si Mike exigi pa atrobe Benny Sevinger keda den Parlamento y si no tin sentencia prome cu e fecha stipula pa postulacion di candidatonan pa eleccio0n 2025, Benny Sevinger por subi lista di AVP como candidato aunke pa Ley e no por tin un strafkaart.
E pregunta grandi cu tur dia ta bira mas grandi na Aruba y den Reino ta, pakico e insistencia di parti di AVP y di Mike Eman, pa Benny Sevinger keda den Parlamento mientras e sentencianan di Corte di Justicia den Prome Instancia y den Apelacion ta papia un palabra cla y hasta empeora.
Mas serio ta e hecho cu prome cu eleccion 2025, e caso di Un Miyon di Benny Sevinger ainda mester wordo trata den Corte despues di a wordo suspende en espera di e decision di Corte den Prome Instancia.
