BCA a reduci e tasa di reserva obligatorio cu 0,5 punto di porcentahe na 22,0 porciento

For di 1 di december 2023.

ORANJESTAD (AAN): Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente.            

             Durante e reunion di 27 di november 2023, CMM a dicidi pa baha e tasa di e reserva obligatorio cu 0,5 punto di porcentahe na 22,0 porciento entrante 1 di december 2023. Di e manera aki, e banconan comercial mester tene un balansa minimo na BCA cu ta igual na 22,0 porciento di e depositonan riba termino cortico di nan clientenan. E decision pa reduci e tasa di reserva obligatorio ta basa primordialmente riba e reservanan oficial y internacional cu a permanece na un nivel adecua,  apesar di un caida te cu 13 di october 2023 compara cu fin di 2022.

            Tambe, reservanan oficial y internacional ta premira di keda adecua y subi durante e resto di 2023. Adicionalmente, likides excesivo di e sector bancario a baha na october 2023 compara cu december 2022, primordialmente causa pa un subida den credito. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.

   E CMM a considera e siguiente informacion y analisis den su deliberacion.

   Reservanan internacional y oficial: E reservanan internacional, cu ta consisti di reservanan oficial di BCA y reservanan di divisa na e banconan comercial, a baha cu Afl. 218,7 miyon te cu 13 di october 2023, compara cu fin di december 2022 (Grafico 1). E reservanan oficial a mengua cu Afl. 215,3 miyon, mientras cu e reservanan na banconan comercial a baha cu Afl. 3,4 miyon. Consecuentemente, te cu 13 di october 2023, e reservanan oficial y internacional a suma Afl. 2.575,6 miyon y Afl. 3.021,7 miyon, respectivamente.

            Sostene un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, apesar di e caida menciona anteriormente, reservanan internacional a keda ampliamente riba e rekisito di tres luna di pago riba e cuenta coriente di e balansa di pago te cu 13 di october 2023. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI) (Tabel 1).

   Inflacion: Inflacion, midi na final di luna contra e mesun luna di e aña anterior, a acelera di 0,5 porciento den augustus 2023, pa 1,7 porciento na september 2023 (Grafico 2). E contribuyentenan principal na e inflacion, midi na final di luna contra e mesun luna di e aña anterior, na september 2023, tabata ‘comunicacion’ (contribuyendo cu 0,6 punto di porcentahe) y ‘cuminda y bebida no alcoholico’ (contribuyendo cu 0,5 punto di porcentahe). Aunke na un grado mas abou, ‘diferente producto y servicio’ (contribuyendo cu 0,4 punto di porcentahe), y ‘vivienda’ (contribuyendo cu 0,4 punto di porcentahe) tambe a aporta na e inflacion, midi na final di luna contra e mesun luna di e aña anterior, den september 2023.

   E inflacion midi riba promedio di 12 luna a alcansa 4,5 porciento na september 2023; un caida compara cu 4,9 porciento na augustus 2023. E presion inflacionario tabata mas tanto debi na e subida den e tarifa di awa y coriente desde augustus 2022 y e aumento den prijs di cuminda y bebida no alcoholico. Ademas, Aruba a importa un gran parti di e crecemento den prijs for di su partnernan comercial, particularmente Estados Unidos y Europa.

   Mientrastanto, na september 2023, inflacion basico (cu ta exclui cuminda y energia) a alcansa 1,6 porciento si midi e final di respectivo luna contra e mes un luna di e aña anterior (augustus 2023: 1,2 porciento). Basa riba un promedio di e ultimo 12 lunanan, inflacion basico a yega na 2,0 porciento (augustus 2023: 2,1 porciento).

  Likides excesivo di e banconan comercial: Likides excesivo di e banconan comercial (incluyendo credito cu no a wordo aloca ainda y otro compromisonan) tabata Afl. 456,3 miyon na october 2023, esta, Afl. 64,2 miyon mas compara cu september 2023 (Grafico 3). E subida aki ta causa parcialmente pa e reduccion di 1 punto di porcentahe den e tasa di reserva obligatorio desde 1 di october 2023. Di otro banda, ora cu compara cu fin di december 2022, likides excesivo ta refleha un contraccion di Afl. 363,4 miyon. E caida aki tabata principalmente debi na refinanciamento di fiansanan internacional riba mercado local y compra di bono di gobierno pa inversionistanan institucional. Mientrastanto, un calculacion preliminario di e likidez excesivo ta sugeri un subida te cu november 17, 2023 compara cu october 31, 2023.