Lucia Hoek, Coordinador Centro Kibrahacha:
ORANJESTAD (AAN) – Coordinador di Centro Kibrahacha, señora Lucia Hoek, den entrevista cu DIARIO a duna di conoce cu e proximo Domingo, 3 di November, nan tin nan bazaar. Esaki ta cinco aña despues di Covid-19 cu e evento aki ta bin bek.
Lucia Hoek ta invita pueblo en general pa pasa na Club Kibrahacha, na Piedra Plat. Entrada ta un florin, y esaki pa gana un doorprize, pasobra nan intencion ta cu pa un florin duna algo bek. Muchanan bao 5 aña no ta paga.
Paden lo topa cu un bunita bazaar cu obranan di man traha pa e mesun clientenan, algun di Pasco caba y otronan ta cosnan cu por uza tur momento na cas.
E obranan aki ta di gran balor pasobra ta mustra kico e miembronan di e Club por haci. Tambe lo tin nan minimarket cu productonan cu e club ta haya for di instancianan y comercio local. Tambe tin nan seccion di mata, tin nan benta di bolo y coi dushi. Bar y cushina sin duda, lo ta bon surti, incluyendo BBQ.
E evento ta cuminza for di 10 or di mainta te cu 5 or di atardi. Lucia Hoek ta invita henter pueblo pa bin wak con Kibrahacha ta, haya mas informacion, y pa colabora pasobra e placa recauda ta pa hinc’e bek den nan miembronan. Pues, e ta un fundraising pa e miembronan haya probecho di dje.
