ORANJESTAD (AAN): Apertura di Festival di Buki pa Mucha ta diadomingo awor, 3 or y ta tuma luga na Cas di Cultura.
Tur mucha y nan mayor ta bonbini na Cas di Cultura pa un evento grandi, festivo y gratis. Un evento cu baile, musica, buki, autor y ilustrado di diferente pais y isla.
Diadomingo awor por experencia e tema di e aña aki “Dushi cabesura!”. Muchanan por canta e cantica di festival cu lo worde canta pa Kitai de Jongh y acompaña cu un baile di e muchanan di Prinses Amalia Basisschool bou guia di Marcie de Jongh y por baila hunto cu e bailadonan.
Tambe tin riba programa “Diamond Kids”. Biblioteca ta presenta tur autor y ilustrado cu ta bishita mas cu 50 scol otro siman. Fundacion Rosea Cultural ta presenta un sketch y baile, Liliana Erasmus ta conta un storia y directora di biblioteca tambe.
Kylie & Katya ta presenta e cantica “Coco”. Cas di Cultura ta habri porta 3 or y ta cuminsa cu un mercado di buki. Show ta cuminsa 4 or. Tur mucha por trece ruman y amigo, welo cu wela! Riba e potret por mira grupo di baile.
