Batata cu yuca y batata dushi tabata loke a baha di prijs den luna di Juni

Segun Oficina Central di Estadistica

ORANJESTAD (AAN): E indice di “Cuminda & servicio di catering” a registra un subida di 1.0% na Juni 2022, despues di un subida di 1.1% na Mei 2022. E indice di “Cuminda na cas” (1.2%) a registra un subida, unda 7 di e diesun indicenan di e gruponan di cuminda na cas a subi na Juni 2022.

   E indice di “Carni” a conoce e subida di mas grandi (3.6%) na Juni 2022. Otro subidanan significante a worde registra den e indicenan di “Azeta y otro productonan traha di vet” (3.1%), “Pan y otro productonan di grano” (1.1%), “Bebida no-alcoholico” (0.9%) y “Restante productonan pa alimentacion” (0.8%).

   E indice di “Batata, yuca y batata dushi” (-2.2%) a registra e caida di mas grandi na Juni 2022.

   Den e ultimo 12 lunanan e indice di “Cuminda & servicio di catering” a subi cu 9.5%. E indice di “Cuminda na cas” a conoce un subida di 11.1%, unda tur e 11 indicenan di e gruponan di cuminda na cas a subi durante e ultimo aña. E indice di “Azeta y otro productonan traha di vet” a subi cu 24.3%, e subida di mas grandi entre e gruponan di cuminda na cas.
   Otro subidanan significante a worde registra den e indicenan di “Carni” (13.7%), “Fruta” (13.5%) “Lechi, keshi y webo” (11.7%), “Pan y otro productonan di grano” (11.1%), “Pisca y otro cuminda di lama” (10.9%) y “Batata, yuca y batata dushi” (9.4%).

   E indice di “Cuminda pafo di cas” a subi cu 0.6% na Juni 2022 y a registra un subida di 5.9% den e ultimo 12 lunanan.

   Na Juni 2022, “Cuminda na cas” y “Cuminda pafo di cas” como grupo, tabata tin un subida di prijs di 1.0% compara cu Mei 2022 y hunto tabata tin un influencia di 0.16 ppt riba e CPI, mientras cu e restante bienes y servicio hunto a experencia un subida di prijs di 0.7% y tabata tin un efecto di 0.59 ppt riba e CPI.