Barco Hulandes Zr.Ms. Friesland a yega Aruba y saluda gobernador

ORANJESTAD (AAN): Diaranson mainta, e barco Zr.Ms. Friesland a yega den puerto di Oranjestad. 

E barco patruyero aki ta e stationschip nobo den Caribe Hulandes.

   Tabata luna pasa dia 11 di Januari 2022, cu e patruyero aki a sali for di Den Helder na Hulanda pa bin haci e trabao aki di vigilancia rond di e islanan Hulandes den Caribe, y sirbi tambe un tarea importante di vigila contrabando di hende, di droga, y tambe duna yudanza den emergencia na islanan cu ta wordo azota pa cualkier evento natural di desastre.

   E barco Zr.Ms. Friesland a reemplaza Zr.Ms. Holland cu a regresa bek di luna pasa caba.

   Diaranson mainta, na altura di Wilhelmina Park, den presencia di Gobernador Alfonso Boekhoudt, e marineronan di Marina Real di Savaneta a ricibi’e riba e beach banda di West Deck Restaurant.  Aki e barco a los 21 tiro di saludo cu cañon, y e Mariniernan na costa a contesta bek cu 21 tiro tambe.