ORANJESTAD (AAN): E barco Zr.Ms. Friesland den corto tempo a sa di intercepta como 850 kilo di droga riba Lama Caribe.
Un boletin nobo emiti Diamars mainta door di Defensa Hulandes, ta splica cu ta trata aki di dos caso separa di transporte di droga.
Ademas di esey, e barco Friesland a duna un man tambe pa captura un boto sospechoso di piscado. E boto a wordo lastra pa Aruba unda e ta wordo investiga awor door di Ministerio Publico.
Tabata avionnan di tanto Guardacosta di Caribe Hulandes, y tambe US Coast Guard cu a detecta ambos transporte di droga, tur dos cu speedboat tipo GoFast. E barco Zr.Ms. Friesland a cuminza mobiliza den nan direccion, y despues a baha nan speedboat special FRISC, cu a yega mas rapido na tur dos GoFast.
Despues di un persecusion, e tripulantenan di GoFast a dicidi na rindi y a stop nan boto. Tur dos biaha, e FRISC tabatin abordo un team combina di militarnan di barco Friesland, di US Coast Guard, y tambe Fleet Marine Squadron di Marina, kendenan a confisca e droga y a detene e tripulantenan.
Den e prome caso cu nan a intercepta, a bin haya 500 kilo di droga abordo di e GoFast aki. Den e di dos caso, a bin haya 350 kilo.
E barco Zr.Ms. Friesland ta desde Januari 2022 den Caribe funcionando como Stationsschip Caribisch gebied. Nan ta duna sosten tambe na Guardacosta di Caribe Hulandes. Te cu awor, Friesland a logra di kita 1.075 kilo di droga for di riba caya.
