Barco di Marina Zr.Ms. Holland ta na caminda pa Haiti

ORANJESTAD (AAN): Hulanda a manda un yudanza di emergencia na Haiti. Zr.Ms. Holland ta na caminda pa e pais cu diasabra a wordo afecta pa un teremoto di 7.2.

E barco di Marina na Corsow ta transporta entre otro alimento, awa y provision di auxilio. Abordo tin tambe un  helicopter NH90, speedboat y un ekipo di por lo menos 22 militar extra. Ta trata di marinier y soldatnan di ehercito.

E militarnan tin un cantidad di boto di rubber den nan disposicion. Cu esaki, entre otro e personal civil medico internacional ta wordo transporta na e partinan mas profundamente afecta di Haiti. E militarnan ta atende mas tanto cu distribucion di alimento, provision di auxilio y material medico. Nan tambe lo analiza y stipula e daño, pa asina tin mas claridad riba e necesidad cu e poblacion.

Hulanda ta traha hopi estrecho cu Union Europeo, Reino Uni y Merca. E Ministerio di Relacionnan Exterior y Union Europeo ta financia e ubicacion di e barco di Marina. Relacionnan Exterior tin un fondo humanitario. E yudansa di emergencia militar ta ademas di e yudansa financiero cu Hulanda ya a pone disponibel, na entre otro Cruz Cora y organisacionnan di Nacionnan Uni.

-Morto y heridonan

E cantidad di morto na Haiti a subi na mas di 2.100 victima. Segun calculonan, tin alrededor di 10.000 herido. Mas cu 135.000 edificio a sufri daño of a keda destrui.  Ta trata di vivienda, hospital y scolnan. Cuido medico y awa limpi pa bebe ta skars, loke por hiba na brote di colera na un gran escala.

-Tripulacion di 75 miembro

Comandante di Forsanan Naval den Region Caribe ta dirigi e esfuerso militar di e yudansa di emergencia. E barco di patruya en principio a wordo desplega pa 2 siman. Abordo di Zr.Ms. Holland, tin ademas di e ekipo di yudansa, un tripulacion di mas o menos 75 miembro y algun marechosé/Polis Militar. Zr.Ms. Holland desde Mei 2021 ta den region Caribe, entre otro pa lucha contra droga.