HAL Zuiderdam riba viahe di 17 dia largo
ORANJESTAD (AAN): Diaranson siman pasa dia 11 di December 2024, pa 7:00 am e barco di Holland America Line, esta “Zuiderdam” a drenta Waf di Aruba y a mara na Pier B. Esaki ta situa net pazuid di e edificio di antes Carlos & Charlie’s den Weststraat.
E barco a keda mara eynan te cu 4:00 pm, pa asina a sigui su viahe den Caribe. Pero awor como un siman despues, a sali confirmacion cu un brote di e malesa yama ‘Norovirus’ (cu ta dunabo malestar di stoma, cu sacamento y diarea cu hopi dolor di barica, dolor di cabez, y keintura) a wordo detecta abordo cerca pasaheronan.
Barconan crusero cu ta nabega saliendo of regresando puertonan na Merca, tin obligacion di raporta casonan asina na Centers for Disease Control and Prevention (CDC) na Atlanta, Georgia. Y a sali na cla cu net ora cu e barco tabata mara na Aruba, cu nan a raporta e brote.
Y no ta djis pasahero a wordo afecta pa e malesa, sino tripulantenan tambe.
E barco a sali originalmente dia 4 di December 2024 pa 3:00 pm for di Port Everglades na Fort Lauderdale (Florida) y a regresa Diasabra 14 di December bek. Pero tabatin pasahero cu a keda abordo, pasobra nan a uza e opcion pa un viahe di 17 dia, yama “Southern Caribbean Seafarer”. E gruponan aki ainda ta riba e barco, ya cu e viahe di 17 dia ainda no a finalisa, y e barco lo yega Merca bek te Diasabra awor, 21 di December 2024 pa 7:00 am.
Te cu ultimo informe, 74 di e 1.923 pasaheronan (menos di 4% di e pasaheronan), y tambe 4 di e 757 tripulantenan a bira malo. Asina cu e compania crusero a haya sa di e brote, mesora nan a implementa protocolnan estricto di limpieza, bao guia di CDC pa minimaliza mas transmision. Nan ta isola e pasaheronan cu a bira malo, y a cuminza cu medidanan riguroso di limpieza y desinfecta areanan publico.
Dia 14 di December ora el a mara bek na Fort Lauderdale, tur pasahero a wordo informa cu lo tin un retrazo pa e viahe sigui bek, pasobra a desinfecta henter e barco.
Te cu awor den 2024, CDC a registra un total di 12 brote di Norovirus riba barconan crusero cu ta sea sali of regresa Merca.
Esaki no ta prome biaha cu Holland America Line a confronta brote di Norovirus den 2024. Na comienso di aña, e barco Koningsdam a experiencia un situacion similar cu a afecta 98 pasahero y 12 tripulante durante un viahe crusero entre Hawaii y Polynesia Frances.
Tin di nota cu Norovirus por keda contagia hende pa te cu 2 siman despues cu e sintoma desaparece di un persona. Pero limpieza y accion di desinfecta ta crucial pa evita mas brote.
