Bandera di SDGs a wordo hisa dilanti di Bestuurskantoor

ORANJESTAD (AAN):  Anualmente riba e fecha 25 di september ta celebra aniversario di e Metanan di Desaroyo Sostenibel, “Sustainable Development Goals” (SDGs).

            E aña aki na e di 6 aniversario di e metanan di desaroyo sostenibel Premier Evelyn Wever - Croes den nomber di Gobierno di Aruba a hisa e bandera di e metanan stipula pa logra na 2030 dilanti di Bestuurskantoor na unda tambe el a duna un discurso cortico enfatisando e importancia di e metanan di desaroyo sostenibel pa nos pais.

            SDGs ta encera un total di 17 meta stipula como guia pa yega na e nivel di prosperidad y paz mundial. E metanan aki ta consisti di 5 pilar:  E Ser Humano, Planeta, Prosperidad, Paz y Colaboracion. Pues SDGs ta forma un compas y ta duna direccion pa por yega na un comunidad y un Pais mas resiliente.

            "Pa Aruba e SDGs ta un prioridad tambe a pesar di e retonan cu nos tin como Pais chikito. Awor mas cu nunca cu mundo henter ta experenciando retonan grandi a consecuencia di e pandemia, nos ta keda mes determina pa Aruba hunto cu mundo henter, traha den bon colaboracion pa e SDGs por brinda paz, prosperidad y un planeta sano", Prome Minister Wever - Croes a expresa.

            Gobierno di Aruba ta uni su mes y ta wak e SDGs como un guia pa tambe por yega na un nivel eleva di prosperidad y na unda paz ta reina pa un y tur, respetando naturalesa. Mescos cu mundo ta celebrando e SDGs, Aruba su respuesta na e retonan nos dilanti mester ta uno di union unda cu ta invita henter comunidad, sector publico, sector academico y NGO’s pa hunto enfoca pa desaroya solucionnan inovativo y sostenibel.

            Prome Minister a conclui enfatisando cu pa realisa e metanan aki exitosamente e ta rekeri esfuerso di nos tur. "Gobierno no por haci’e su so, Aruba mester di nos tur. Cu accionnan decisivo nos por progresa, nos por avansa y nos por crea un futuro resiliente pa un y tur riba nos isla. Nos bienestar ta depende di bienestar di otronan", e mandatario a expresa.

            Di e forma aki Premier Wever-Croes a invita e boluntarionan pa hisa e bandera di SDGs.