ORANJESTAD (AAN): Riba 20 di november 131 ta celebra 25 aña di existencia aki na Aruba y Dia Internacional di Mucha.
Banda di e servicionan di telefon, email y chat, 131 ta brinda e servicio di charla, workshop, proyecto y training na muchanan, hobenan y docentenan na tur scolnan aki na Aruba. E scolnan na Aruba ta partnernan importante di 131. E scolnan, e docentenan, e muchanan y hobennan ta parti di e exito di 131.
Pa medio di informacion preventivo cu e muchanan, hobennan y docentenan ta ricibi for di 131 durante charla, workshop, proyecto y training, hopi problema ta ser evita efectivamente.
De cuadro di e celebracion di dia Internacional di Derecho di Mucha y 25 aña di existencia di 131, un total di 48 scol ful rond di Aruba ta lanta e bandera di 131 ariba dia 20 di november. Cu lantamento di e bandera di 131, e scolnan ta mustra nan apoyo y gradicimento pa e trabao cu 131 ta implementa na e scolnan.
131 kier a gradici e scolnan na Aruba y su otro partnernan cu ta tuma nan impacto social na serio y ta inverti den e muchanan, hobenan y famia aki na Aruba.
