Banco di Caribe a haci donacion di 25 tas di scol y articulo na Música Por Educación

ORANJESTAD (AAN): Un djis scol ta bolbe habri! Banco di Caribe un biaha mas a contribui na e radiothon di Caliente 90.7fm. 

E aña aki e radiothon lo tuma lugar riba 6 di augustus benidero, for di 6’or di mainta pa 6’or di atardi.

            Esaki ta e di 10 aña consecutivo cu Caliente 90.7 FM ta organisa e radiothon pa recauda material di scol pa mucha di menos recurso. Banco di Caribe a haci entrega di 25 tas di scol completamente yen pa asina yuda muchanan di menos recurso yega na material y articulonan di scol. Pa Banco di Caribe semper ta un placer pa por duna aporte na nos comunidad.

            Tur articulo di scol colecta durante di e radiothon lo wordo duna na muchanan di menos recurso y tambe na Fundacion pa nos Comunidad. Tur esunnan cu ta desea di contribui mescos cu Banco di Caribe y mester di mas informacion por yama 5822339 of por manda un WhatsApp na 5889077.

            Sr. Giovanni Croes, director di Banco di Caribe un biaha mas ta aplaudi e iniciativa di Caliente 90.7 FM y ta encurasha nos comunidad pa duna un man na bienestar di nos futuro generacion. Banco di Caribe ta desea tur mucha un feliz aña escolar 2022/2023.

            Riba foto por mira director di Banco di Caribe Sr. Giovanni Croes, hunto cu Sra. Sue-Lan Liao Jen entregando 25 tas completamente yen cu articulonan di scol na Sr. Juan Carlos Ventura director di Caliente 90.7 FM.