Awe mas cu nunca nos mester uni como pais y orguyosamente celebra nos Dia Nacional cu gran fervor.
Den momentonan di tribulacion, pueblo mester para un rato keto y recorda y reflexiona loke e nificacion di nos Dia di Himno y Bandera ta.
Pueblo corda un tiki riba e lucha cu esnan prome cu nos a hiba pa awendia nos por logra ta autonomo den Reino Hulandes.
E lucha cu a hiba pa tanto tempo pa awe nos por ta baas na nos mesun cas, ta motibo suficiente pa cada un di nos riba e pida baranca aki, naci na Aruba of no, sigui lucha tur dia pa hiba nos pais dilanti y den un mihor desaroyo colectivo.
E sentimento patrio di un pais, ta e pasion di su pueblo. P’esey, no bay permiti pa nos entusiasmo caracterisco di ta un Arubiano bay perdi. Pasobra esaki ta un gran virtud cu ta sumamente valioso y necesario pa nos pais.
Nos ta considera e fecha aki esun mas importante pa Aruba como cu nos ta celebra nos Status Aparte y kico tur esaki ta nifica pa nos como pueblo y pais.
E dia aki nos ta celebra manera un pueblo, sin mira color politico, sin mira nos diferencianan. Nos tur cu ta yama nos mes Arubiano lo celebra den union. Sea cu bo ta yiu di tera cu a nace akinan of como persona cu a bin biba aki y contribui na desaroyo di nos pais. Nos tur ta sinti amor y aprecio pa e pida baranca cu nos por yama cas.
E momento aki ta uno oportuno pa enfatisa cu tur decision cu ta tuma, sea den gobierno of parlamento, nos ta haci na bienestar di nos pais. Un cos cu tur miembro den e fraccionnan ta di acuerdo, ta cu nos tur kier mira desaroyonan positivo pa Aruba. No ta importa ki diferencia nos por tin den opinion, na final nos como politico ta pasahero, pero e impacto cu nos por laga atras ta duradero.
Nunca lubida cu Arubiano t'esun cu ta lucha incansablemente pa su pida baranca. Arubiano t’esun cu no ta rindi ora cu retonan dificil bin riba nos caminda.
Pesey nos ta awe un Arubiano orguyoso di nos Himno y nos Bandera. Awe mas cu nunca, bo tin di sinti bo mes orguyoso di ta un yiu di e pida baranca aki cu yama Aruba. Felis Dia di Himno y Bandera.
