Ban causa Furor ta presenta un programa cu enfoke riba Papiamento

Celebracion di Dia Mundial di Lenga Materno

ORANJESTAD (AAN): Diahuebs, 19 di februari 2026, di 6.30 pa 9.00 di anochi lo tin un actividad dedica na celebracion di Dia Mundial di Lenga Materno y mas, na Biblioteca Nacional Aruba, George Madurostraat, Oranjestad.

Ban causa Furor cu un programa cu enfoke riba Papiamento, e lenga materno di mayoria di e ciudadanonan di Aruba.

Den cooperacion cu Astrid Britten, Biblioteca Nacional Aruba, Departamento di Cultura Aruba y Mirto Laclé lo presenta un programa multi-disciplinario enfoca riba Papiamento.

Ban celebra nos lenga materno cu expresionnan den literatura, presentacion di buki, documentario, charla, musica, y canto.

Lo presenta un programa multidisciplinario cu colaboracion y participacion di diferente artista di Aruba.

Lo rindi honor y lo celebra e Centenario (1926-2026) di existencia di e buki “El Papiamento, la gramática más sencilla” e piedra angular, skirbi pa dr. Rodolfo Lenz, y re-edita pa mr. Ralph Yarzagaray na 2009, cu introduccion di drs. Mirto Laclé.

Lo tin presentacion di Grupo Rondalla Universo di Aruba bou guia di Rey Lampe y Michael Croes. E grupo ta consisti di mas o menos 11 guitarista. Nan voznan lo resona y hunto cu nan guitara lo deleita publico.

Academia Musical Harpa y Cuarta bou guia di Edgard Kelkboom lo ta presente cu nan orkesta y coro. Academia Musical Harpa y Cuarta e aña aki ta celebra nan di 30 aniversario y kier celebra y comparti cu e pueblo di Aruba.

Invitado special, autor Desiree Correa, lo presenta su obra literario “Toi-toi-toi”. E buki “Toi-toi-toi” ta contene diferente obra di teatro cortico na Papiamento. Obranan di Teatro skirbi pa Desiree y tambe obranan di teatro traduci y adapta pa Desiree Correa. E buki lo ta obtenibel.

Ronny Kock, conocido cantante lo interpreta e cancion ‘Julie’ di Julio Bernardo Euson, na Papiamento. Presentacion poema di Aurelia Croes y Marilis Becker.

Bin celebra hunto cu Biblioteca Nacional Aruba. Entrada ta gratis.

Pa mas informacion por tuma contacto cu co-organisado Mirto Laclé na 7426274.