ORANJESTAD (AAN): E evento “Ban Bek Caya”, organiza Diabierna dos siman pasa pa Gobierno di Aruba en colaboracion cu Departamento di Cultura y Aruba Tourism Authority (ATA),
a logra reuni comunidad den un ambiente anima di musica, cultura y compras.
Durante e anochi, publico a disfruta di un programa varia cu presentacionnan musical y baile, combinando ritmo folklorico cu estilo moderno. Diferente artista local y grupo di baile a subi escenario den henter e area, incluyendo DJ Splash, DJ Double R, banda Los Monstros, Gucci Dancers Aruba, Saniflow Dancers y Grupo di Baile Dazzling Dancers.
Tambe talento local manera Rincon Boyz, Isdell, Lens y Ben, Chando, Touch of Steel, Ritmo Real y Kempy a contribui na e ambiente festivo, mientras cu participacion di The Chaz Modeling & Talent School a agrega un toke adicional na e programa.
Un momento special durante e evento tabata e presentacion di finalistanan di Festival “Un Canto pa Aruba” su Himno y Bandera Infantil y Hubenil, resaltando e importancia di desaroyo di talento hoben.
Pa e muchanan, e evento a inclui entretenimiento manera Dino Jump, organiza hunto cu Smart Choice Aruba, asegurando un experiencia agradable pa henter famia.
Ademas, tentnan di comerciantenan chikito a forma un parti importante di e actividad, ofreciendo producto local y cuminda, contribuyendo na dinamica economico y duna espacio pa emprendedornan den comunidad.
“Ban Bek Caya” a confirma su rol como un actividad importante pa promove cultura local, fortalece comunidad y crea oportunidad pa talento Arubiano briya, ademas di servicio y descuento faborabel den un ambiente ameno y orario cumbiniente.
{gallery}Ban Bek Caya a reuni comunidad cu musica, cultura y ambiente familiar{/gallery}
