Baluartenan reconoci durante Fiesta di Cunucu

ORANJESTAD (AAN): Diadomingo ultimo riba su di dos edicion a celebra “Fiesta di Cunucu” organiza pa Departamento di Adulto Mayor

conhuntamente cu Departamento di Agricultura, Cria y Pesca, Santa Rosa. Un combinacion di “Fiesta di Cunucu” cu Mercado Santa Rosa di cual un biaha mas tabata super bon bishita. For di 9’or di mainta ya caba por a mira bishitantenan a cuminsa yega. Tabata tin Cuminda Crioyo, Cos dushi, Berdura Fresco y un cantidad di productonan fresco cu por a probecha cumpra. Prome cu merdia ya e musica a cuminsa zona y e ambiente a start cu Kibrahacha Boys. Pa sera e gran “Fiesta di Cunucu” aki tabata tin musica di “Enkura”

   Manera ta custumber Departamento di Agricultura, Cria y Pesca, Santa Rosa ta reconoce baluartenan den Sector Primario di Aruba. Esaki ta wordo haci riba tur cuater tereno, cu ta Agricultura, Cria y Pesca y tambe Apicultura. Nos ta reconoce nan como “Amigo di Santa Rosa”A scohe cinco baluarte pa por a reconoce riba e dia aki.

   E prome baluarte cu a wordo reconoci tabata sr. Sr. Luis Beltran “Luis” Winterdaal como Baluarte Apicultor. Luis Beltran Winterdaal, miho conocí como “Luee Bee” a nace di 10 october 1954. Luis ta un Apicultor hopi conocí na Aruba, ta Apicultor pa mas cu 52 aña y e ultimo 28 añanan aki ta yuda tur caminda cu tin problema cu abeha sea na cas,den cunucu den edificionan bandona na hotelnan, por bisa full rond Aruba. Luis a cuminsa cu cria di Abeha y colecta honing na Savaneta, den barancanan na Rooi Kochi,Mabon, Pos Chiquito y tambe den erea di unda Parke ta awor e.o. Rooi Taki. Despues Luis a muda pa Casibari y despues pa Sabania Abao unda e tin su Abehanan. Luis Winterdaal semper ta coopera cu Santa Rosa ora cu tin melding cuta yega Santa Rosa di molester di Abeha.

   Como Baluarte “Amigo di Santa Rosa a reconoce Sr. Elauterio “Techi’ Briesen. Elauterio Briesen, miho conocí como “Techi” a nace día 18 di April 1932.  “Techi” ta un piscado di hopi aña desde cu e tabata tin 16 aña a cuminsa pisca.  “Techi” a keda activo te cu su 87 aña y a pisca semper den boto full rond Aruba. Famia completo ta piscado papiando aki di yiu, nieto y bisanietonan tambe ta pisca.

   Como Baluarte “Amigo di Santa Rosa” a reconoce Sr. Gregorio Wolff.  Gregorio Wolff a nace día 24 di december 1946. Gregorio ta un Cunukero y Criado di bestia chikito desde aña 1978 na Palm Beach, den Cunucu cu tabata di su welo. Desde aña 1995 Gregorio a muda su plantacion pa Kamay na unda e ta activo ainda cu plantamento di Boonchi, Concomber chikito y Pinda. Tambe e tin su cura di Carne. Gregorio ta activo pa mas di 48 aña. Tambe Gregorio ta un cliente di hopi aña di Santa Rosa.

  Como Baluarte “Amigo di Santa Rosa” a reconoce Yashen Li. Yasheng Li a nace día 14 di september 1956  ta un horticultor desde aña 1995 y desde aña 199 e tin su plantacion na Caya Frere Arnold y ta cultiva diferente berdura oriental cu e ta bende cu supermercadonan na Aruba. Sr. Li tambe tin mata di fruta e.o mango cu ta duna hopi fruta den temporada cu mango ta pari. Yasheng Li ta un cliente di Santa Rosa pa hopi aña y c uta uza awa di dam pa su cultivonan.

   Como Baluarte “Amigo di Santa Rosa” a wordo reconoci pero lamentablemente no por tabata presente tabata Sr. Francisco Simon Croes. Francisco Simon Croes, mihor conocí como “Chico” a nace día 4 di juni 1939. Chico ta un Agricultor cu ta bin di e bario di Tanki Leendert y for di mucha a yuda su Tata planta Cunucu. Ta activo pa casi 80 aña. “Chico” ta cliente di Santa Rosa pa hopi aña y ta coopera hopi bon cu Santa Rosa. Na algun ocacion cu Santa Rosa no tin suficiente simiya pa planta of pa bende cu otro Agricultor semper “Chico” ta coopera y ta yuda Santa Rosa cu diferente simiya, sea Boonchi, Concomber Chikito, Yambo, Calbas Largo y asina por sigui menciona.

   Na e ocasion special aki di Baluartenan “Amigo di Santa Rosa” reconoci tabata presente sr. Geoffrey Wever minister engarga cu Sector Primario kende a haci entrega di e certificado na cada baluarte y señora Mervin Wyatt-Ras minister encarga cu Salubidad y Adulto Mayor kende a haci entrega di plakaat na caba baluarte.

   Den nomber di Gobierno di Aruba, Departamento di Agricultura, Cira y Pesca Santa Rosa (DLVV) y Derectie Ouderenzaken (DOZ) ta felicita y gradici tur nos Baluarte pa nan imenso trabao y cooperacion ricibi di semper.