Balashi Beer Experience a habri su portanan

Aruba tin un atraccion nobo

ORANJESTAD (AAN): Recientemente Balashi Beer Experience a celebra su apertura oficial riba diasabra 7 di november, na e compleho di entretenimiento Gloria Aruba. Markus Konings, CEO di Sandenburg Experiences, Gobernador Alfonso Boekhoudt, accionista di MetaCorp, Eduardo de Veer y Eddie de Veer como CEO di MetaCorp a efectua e apertura oficial door di corta un cinta grandi na entrada di e edificio.

   E compania mas bieu di Aruba tabata orguyoso di anuncia cu e proyecto a dura 30 luna pa keda cla, a costa nan 30 miyon Florin, a percura pa 20 compania local haya trabao den e construccion y a sigura 18 cupo di trabao nobo pa e ekipo cu awo ta encarga cu e tour moderno aki. E proyecto ta ocupa un espacio di 1.300 m² den un ampliacion di Gloria Aruba. “Inversion den nos propio economia ta un costumber di MetaCorp. Y ta for di e pensamento aki a nace e idea pa añadi un concepto nobo y moderno den e edificio di Gloria, pa por atrae mas turista den e compleho di entretenimento” asina Eddie de Veer a duna di conoce.

   Un di e momentonan destaca di e programa tabata e tour durante cual Gobernador Boekhoudt a wordo acompaña pa Eduardo de Veer y Eddie de Veer. Durante e recorido, nan a conoce e diferente zonanan cu ta trece e historia di Balashi y su conexion cu Aruba, su cultura y su pueblo na bida.

E atraccion ta dirigi na habitantenan adulto di Aruba, turista cu ta hospeda na nos isla y pasaheronan di crucero.