Solange Tchong, Relacionista Publico:
ORANJESTAD (AAN)-- Relacionista Publico di AZV, Solange Tchong, a confirma cu AZV ta den un destaho publico, relaciona cu e cuido medico den exterior, den entrevista cu DIARIO.
Tchong a indica cu AZV ta den e etapa di licitacion unda cu a invita algun clinica, en special di Colombia, pa bay den e proceso aki, y cu ta clinicanan cu a cumpli cu tur e exigencia y rekisitonan cu AZV como compania ta pone.
Den esaki, ta hunga un rol cu un di e puntonan cu AZV kier yega na dje, ta enberdad percura pa e proceso bay un poco mas lihe y percura pa baha e tempo di spera ora cu e pashent mes ta na Colombia.
Pa locual ta e situacion aworaki, no tin un cantidad grandi di pashent wardando pa bay afo, pero si ta asina cu paralelo na e peticionnan cu drenta na AZV, AZV ta buscando e miho clinicanan atrobe revisando cu ken e kier sigui aki poco tempo; den e aña aki ken AZV ta bay contrata bek.
“Dentro di esaki mi mester menciona cu lo ke nos kier wak ta si den practica e intencion pa haci un peticion cerca AZV tey, pero no tur ora e ta cana asina lihe. Por ehemplo, un asegurado ta yama bisa cu el a consulta cu dokter y el a bise cu un siman prome el a manda su peticion pa AZV y cu AZV a ricibi esaki caba. Generalmente nos ta wak den e sistema y nos a ripara cu e docter no a mande ainda. Y hopi biaha e tin di haber cu e presion, cu e gran cantidad di pashent cu un dokter ta maneha, den e caso aki un specialista anto e ora ey cosnan ta tuma un poco mas tempo”, Tchong a indica.
E no ta asina cu no ta duna servicio, pasobra AZV semper tin su comision medico independiente, cu ta evalua e peticionnan y cu ta reacciona y banda di esey AZV tin su linea di emergencia.
