ORANJESTAD (AAN) – Drentando e caminda banda di Wema Ponton, te na cierto distancia e ta un caminda asfalta, pero bayendo ariba mas of menos tres cuadra,
e demas camindanan cu ta lora menos un 300 meter, tin tres caminda di santo: un man robes, otro cu ta core straight y otro cu ta bay man robes. Riba henter e bario aki ta circula cantidad di auto, sea di habitantenan mes of di otro personanan cu ta corta caminda pa sali den e area di EPB of Santa Helenastraat.
E cantidad di stof cu e autonan ta lanta ta enorme. Den e casnan cu no tin cura cera sino cu ta habri no por tin porta di cas habri ni sikiera cu e calor sofocante cu tin actualmente. Asina mes mester pasa basora pa bari stof mainta, atardi y anochi.
DIARIO por a compronde cu den e bario tin diferente persona (mucha y adulto), cu ta sufri di alergia debi na e stof aki, y cu tin añanan cu nan a pidi e gobiernonan na turno pa pone asfalt pasobra ta necesario, pero te dia di awe no a toca nan e bon suerte aki, apesar cu eynan ta biba trahadornan cu ta paga nan impuesto debidamente, y simplemente tin derecho di biba sin guli stof dia aden dia afo, aña aden aña afo.
Un yamada un bez mas na Ministerio di Infrastructura, pa wak di cerca e situacion, pone man na curazon y laga basha asfalt den e area cu ta wordo mustra via potret.
