AZV di acuerdo pa specialistanan bin Aruba pa haci operacion y regresa nan pais

Ya caba e ‘omgekeerde uitzending’ aki ta wordo haci

ORANJESTAD (AAN): Durante e anuncio di e relato anual nobo di AZV, e director ing. Edwin Jacobs a elabora riba diferente punto di interes.

   Uno di nan cu el a amplia riba dje, ta e importancia di ImSan awor na Aruba.

   El a splica cu Instituto Medico San Nicolas, compara cu aña 2017, awor na 2021 por mira un aumento grandi den gastonan di ‘servicio’ cu nan a cumpra di ImSan.

   AZV ta cumpra servicio di ImSan, mescos cu nan ta haci cu Hospital di Aruba.  Esey ta cu AZV ta paga un solo suma (‘lumpsum’) y cu e placa ey e Instituto Medico ta ofrece e pashentnan un variedad di servicio, incluyendo cobertura di Ambulans rond di henter e isla.  Pa e mesun suma, ImSan ta duna servicio tambe pa e Clinica di Wowo.

   Na 2020 ya AZV a cuminza manda pashent caba pa ImSan pa haya radioterapia.  Na 2021 e aumento a bira relaciona cu e inversionnan haci pa asina Radioterapia wordo haci na Aruba mes.

   Importante pa ImSan ta e hecho cu nan tambe ta aplicando e asina yama “Omgekeerde Uitzending”, esta cu normalmente pashent di AZV ta wordo manda den exterior pa ricibi tratamento cu no tin na Aruba.  Pero ‘Omgekeerde Uitzending’ ta net lo contrario, unda cu e Specialista ta wordo treci Aruba pa atende e pashent na e isla aki mes.

   E tratamentonan aki por wordo aplica den casonan cu no ta menazante pa bida di e pashent.  Durante 2021 e tratamento cu a wordo duna ta pa pashentnan cu ta sufri di ‘Strabismus’, cu ta un condicion medico unda e wowonan di e pashent no ta alinea corectamente cu otro ora di mira un obheto.

   Tambe awor ImSan tin 22 cama pa permanencia cortico di pashentnan eynan.

   Loke si a mira ta cu na ImSan tambe tin un lista di espera pa operacion di wowo na San Nicolas, y cu ta hayando AZV su atencion pa mira con ta bay atende cu esaki.