AZV a inicia controlnan pa medio di auditoria pa loke facturacion di hospital y clinicanan na Colombia

Edwin Jacobs, Director:

ORANJESTAD (AAN):   Director, Edwin Jacobs a duna di conoce cu e organo ehecutivo di AZV ta den e fase final di e destaho pa contrata clinica y hospitalnan na Colombia pa ora di manda pashentnan di Aruba pa haya tratamento.

            El a splica cu den e cuadro di esey, den e ultimo dianan tabata tin di bishita na Aruba representantenan di e compania RGC Activa, cual ta e compania cu AZV ta contrata pa haci auditoria di facturacionnan na Colombia.

            Tin e impresion den comunidad, cu e clinicanan y hospitalnan na Colombia ta factura y cu AZV  simplemente ta paga. E no ta asina, Jacobs a subraya.

            El a sigui bisa cu na momento cu un asegurado ta wordo manda pa tratamento na Colombia, e ta bay cu un carta di garantia y cu e tratamento describi den dje, cu fecha. Ora cu e tratamento mester tuma mas dia, e hospital tin cu haya aprobacion di AZV pa haci esey.

            Na momento cu kier haci un test cu no ta cuadra cu e tratamento pa cu e malesa cu e pashent a bay, e tin cu haya aprobacion, a remarca. Constantemente mester aprobacion pa diferente tipo di test y pruebanan adicional, a bisa.

            El a señala cu e compania RGC Activa ta dunando servicio di auditoria di facturacion na AZV pa 5 aña caba. AZV tin un contract cu e hospitalnan aki y a base di e contract ey nan ta factura.

            Pa tratamentonan cu no ta den e peticion describi segun pashent mester sigui un proceso di aprobacion di AZV pa cu esaki.   

                        Asina cu e pashent ta regresa Aruba, e momento ey e hospital ta manda un factura pa AZV. E factura no ta bin di biaha pa AZV. E factura ta bay prome pa e auditor cu ta RGC pa efectua e control debido y pa wak cu tur cos ta conforme contract, a señala.