ORANJESTAD (AAN): Cos awor si a cuminza sali for di man na Aruba! Imaginabo si acaso un turista haya accident mientras e ta coriendo den un Taxi Pirata.
E embergadura di e accident ey ora cu e turista bay cuminza ‘sue’, lo ta amplio! E taxista pirata mes lo descubri cu su Aseguro no ta cubri costo di Hospital di e turista, y e lo tin di bay saca tur cos di su cartera. Si acaso e no tin placa, e Turista lo bay hibe dilanti Corte pa exigi pago.
E turista lo por hasta hiba Gobierno dilanti Corte, argumentando cu e isla di Aruba no ta haci suficiente pa elimina Taxi pirata riba e isla.
Tabata Dialuna mainta pa 11:30 am, cu na Polis a drenta e informacion cu tin un posible Taxi Pirata coriendo e momento ey riba caminda di Noord ta bayendo Playa. A ricibi tip cu e lo ta e momento ey e lo ta na altura di Rotonde di Ponton.
Bon mes cu Polis a ricibi descripcion di e vehiculo, esta cu e ta un Toyota Yaris color blauw, y cu e lo tin algun Turista ta transportando.
Polis a keda core rond pero no a mire. Despues nan a dicidi bay check den area di Parada di Bus Chikito.
Aki a bin topa cu e Toyota Yaris blauw y mesora nan a duna nan un señal pa stop na altura di e edificio di Doña Clara.
E chauffeur tabatin un turista den auto, cu el a bin cu storia cu el a djis ‘dune un lift’.
Polis a papia fuerte cu e chauffeur, y a pone na altura kico e consecuencia ta si e transporta hende a cambio di pago. E chauffeur e biaha aki a haci comosifuera el a compronde, y a bisa nan cu un cara seco cu e no a transporta ningun hende a cambio di placa, pero el a duna e Turista ey si un lift.
Nan a pone Central di Polis na altura di esaki, y mientras tanto Polis ta keda cu atencion riba e Toyota Yaris aki cu ta funcionando como Taxi Pirata.
