Parlamentario Shailiny Tromp-Lee (MEP):
ORANJESTAD (AAN): Durante un conferencia di prensa, Parlamentario Shailiny Tromp-Lee a elabora riba dos punto cu a keda trata durante e reunion di Tripartiet cu a tuma lugar recientemente na St. Maarten. El a splica cu "Geschillenregeling” ta un topico cu Parlamentonan a bin ta tratando pa hopi aña caba.
No solamente den Tripartiet pero tambe den IPKO. el a subraya e necesidad grandi cu tin pa por trata disputanan cu e islanan tin cu Hulanda na un otro manera cu nan ta tumando lugar actualmente. Ta trata disputa encuanto entre otro interpretacion di Statuut.
Na e momento aki, ora tin un diferencia di opinion entre Aruba y Hulanda, hopi biaha e ta worde poni back den man di esun cu a tuma e decision, cual ta Rijksministerraad (lesa Hulanda), resultando cu hopi biaha no ta logra cambio den decisionnan cu a worde haci.
Parlamentario Tromp-Lee a sigui splica cu sigur tin un disputa actualmente ora nos wak con e negosacionnan entre Aruba y Hulanda pa cu e pago di e fianza di COVID ta bay. Mas cu nunca nos ta sinti e necesidad di uN Geschillenregeling. Pa loke ta trata e refinanciamento ta trata un disputa riba articulo 36 di Statuut, cu ta e articulo cu Aruba, Curacao y Sint Maarten a uza ora a bati na porta di Hulanda pa pidi ayudo pa asina por a maneha e pandemia.
Pa hopi aña ta trahando riba un Geschillenregeling. Na aña 2019, Parlamentonan di Aruba, Curacao, St. Maarten y Hulanda a yega relativamente Cerca di concretisa uno, pero lamentablemente no a logra haya e sosten na final door di Hulanda, cu toch kier mantene e porta habri pa Rijksministerraad por desvia di e decision di e organo independiente.
Na e momentonan aki un biaha mas tin un concepto cla, cu a worde presenta durante e reunion di Tripartiet recientemente. Tabata tin dos ultimo remarke di DWJZ Aruba riba e concepto aki y awor cada pais a bay back pa atende cu esakinan den nan respectivo Parlamento.
Durante Tripartiet a keda palabra cu lo fiha un fecha pronto pa finalisacion y entrega di esaki. Cada Parlamento mester trat’e na cas y djei lo presente na Gobierno. Tromp-Lee ta indica cu e ta spera cu por entrega e Geschillenregeling aki prome cu aña caba na Gobierno, pa asina e encamina e proceso determina y porfin den Reino nos por yega na un organo independiente y imparcial cu por atende cu disputa huridico den Reino y cu ta bay duna un "uitspraak cu ta bindend.”
