Awor Luna Foundation a logra rescata un baca tambe

ORANJESTAD (AAN): E ta algo notabel, manera Zoey Conijn-Berkel di Luna Foundation Aruba mes a indica e siman aki.

   Luna Foundation a cuminza prome ta rescatando cachonan.  Despues nan a cuminsa haya pushi tambe.  Posteriormente tabatin yegada di cabrito, y despues porconan tambe a uni na e famia.  Despues di esey a yega coneu, y tortuganan tambe a yega, pero mas poco-poco.  Ademas galiña y gay, nan tambe ta pensa cu nan ta bibando eynan caba.

   Di e forma ey, e lugar di Luna Foundation a cuminza yena, y ta bin danki na e amor grandi cu e hendenan aki no tin djis pa cacho, pero pa tur animal.

   E siman aki nan ta introduciendo pueblo na nan residente di mas nobo, y esaki ta ‘Betsy’.  Betsy ta un baca, pa ta preciso, e ta un baca na estado.

   Su yegada eynan a laga e cachonan keda confuso, porconan a bira curioso, y e cabritonan a cuminza actua comosifuera nan ta doño di e luga.  Toch Betsy ta costumbrado trankilamente y preparando pa e trece su yiu na mundo.

   Luna Foundation pues ta un lugar no djis safe pa cacho, pero tambe pa otro animalnan.  Mirando con e lugar ta crece, nan tin miedo cu diripiente un giraf lo yega eynan.