ORANJESTAD (AAN): Despues di hopi wardamento, awe porfin e dia a yega!
E gran apertura di Weganan Escolar 2023 lo bay ta na Compleho Deportivo Frans Figaroa na Shaba.
E lo cuminza pa 5:00 pm cu e “warm up jam” dilanti Compleho Deportivo Frans Figaroa na Noord. E fiesta deportivo ta start cu entretenimento di musica di DJ, brassband hunto cu e mascota Wiwi saludando e muchanan. Tambe, pa e muchanan lo tin entretenimento di Dino Jump, cu cantidad di tent di e.o. Cuminda, Bebida, Cotton Candy y Popcorn. Pa 6’or di atardi e ceremonia oficial lo cuminza cu desfile di tur participante, baile y show cultural y entrada di e antorcha olimpico. E banda musical Tsunami lo deleita tur esnan presente cu nan tremendo musica y pa pone ambiente total.
E meta di Weganan Escolar Aruba ta pa promove deporte bou di nos alumnonan di scol preparatorio, basico y secundario. Minister Endy Croes ta expresa cu deporte ta e vehiculo pa preveni cu e muchanan ta bay riba caya. Rond di mil alumno di 45 scol preparatorio, scol basico y scol secundario di Aruba ta bay enfrenta otro den un competencia amistoso den 7 diferente disciplina, entre otro, badminton, functional fitness, volleyball, basketball, futbol, beach tennis y baile cultural. Tur e scolnan cu a clasifica y drenta e campeonato di Weganan Escolar 2023 ta haya nan propio uniform, pechi, tas, boter di awa y pen pa uza durante e dos simannan di competencia.
Recien mes Ministro Croes hunto cu William Erasmus di IBiSA a elabora un poco mas riba e gran evento deportivo aki. Sr. Erasmuns a indica cu lo tin diferente premio cash, trofeo, medaya y plakaat pa e scolnan ganado. Minister Endy Croes y IBiSA ta invita henter pueblo di Aruba pa bin apoya nos mucha- y hobennan den nan deporte escolar.
