Awenochi tin subasta di obranan di arte di diferente artista pa yuda Casa Cuna y Imeldahof  

Evento di ‘Sold!’ ofreci pa La Cabana

ORANJESTAD (AAN): Den un entrevista cu señora Rina Geerman, kende ta Owners Services Manager di La Cabana Beach Resort & Casino, el a trece dilanti informacion positivo riba nan meta pa duna un man na instancianan di Casa Cuna Progreso, y tambe Kinderhuis Imelda Hof.

   Geerman a declara cu na prome instancia, nan tabatin intencion di organiza un evento special cu ta yuda nan recauda fondo pa yuda tanto Casa Cuna y Imelda Hof.  Esaki ta algo cu nan a yega di haci den pasado caba.

   E biaha aki, a bin cu e idea pa expone obranan di arte produci pa artistanan local cu no ta hopi conoci.  Ora cu a cuminza busca sosten di e agencia local Vibrations PR & Media pa setup esaki, a crea e evento yama “SOLD! Fundraising Art Auction & Expo for our Children of Casa Cuna & Imeldahof”.

   E ta bay ta 3-in-1, unda cu e actividad ta pone spotlight riba artistanan local, ta recauda fondo, y tambe ta crea e concientizacion pa sa con importante ta pa promove mas e concepto di famia di criansa pa e muchanan aki.

   Segun Geerman, e meta ta cu via di arte, ta bay crea speranza pa e muchanan aki, y cu lo bay tin presentenan cu bon curazon dirigi riba e muchanan, cu asina por contribui.  E actividad lo bay ta pues un subasta pa duna e muchanan un futuro.

   Mayoria di e obranan ta di artistanan cu no ta mucho conoci, pero mey-mey di nan tin algun hopi conoci, incluyendo e artista Elvis Tromp.  Ta contento cu a haya algun di su obranan pa yuda cu e evento aki.

   E actividad mes lo bay ta awe Diabierna 31 di Januari 2025, for di 7:00 pm pa 9:00 pm den Mezzanine Area na La Cabana Beach Resort & Casino.

   Rina Geerman a mustra cu yen entusiasmo, cu mayoria di e artistanan lo bay ta presente na e evento di “SOLD! Fundraising Art Auction & Expo for our Children of Casa Cuna & Imeldahof”.

   Geerman a agrega cu nan ta spera awe Diabierna anochi e presencia di amantenan di arte, coleccionistanan, y esnan cu tin hopi amor pa muchanan, pa nan tey na e evento aki na La Cabana.

   E artenan lo keda den e Expo si na La Cabana pa algun tempo, pues tin chens pa publico pasa admira nan despues y mira e creatividad di artistanan local.

   Ademas di e subasta, nan lo ofrece publico tambe e numbernan di Banco di tanto Casa Cuna como tambe Kinderhuis Imelda Hof pa asina nan por haci donacion directo si acaso ta desea esey.

   La Cabana tambe lo duna un aporte na e suma final cu wordo recauda via e subasta, y asina dividi e placa y entrega esaki pa e dos instancianan.