Mas facil, mas lihe y mas caro tambe pa e consumidor:
ORANJESTAD (AAN) – Tocante e reaccion di un dama ama di cas, relaciona cu aumento di prijs di gas, specialmente si pide mas di e 4 boternan cu e consumidor por haya pa aña tin cu paga Fls. 127,75, DIARIO a haya algun opinion similar mas.
Pero ora di puntra e consumidor cu a reacciona, si nan tin un negoshi podise traha snacks pa bende, of haci algo cu mester ocupa mas gas, a bin resulta cu nan ta uzando wash mashin / dryer cu ta traha cu gas.
Esaki ta enberdad un uso domestico, pero e no ta mescos cu e gas pa cushina pa cas. Generalmente, un famia standard ta gasta dos boter di gas pa aña, y podise un di tres den temporada di Pasco.
Pero si ta uza dryer pasobra tin cu laba y seca hopi paña y no tin un patio cu e wayanan pa colga paña laga nan seca cu solo y biento, sino cu ta biba por ta den apartamento chikito cu unico manera di no hiba paña na lavanderia, ta cumpra un wash mashin cu ta traha cu gas.
Tambe por ehemplo, si un miembro di famia ta haci trabao di construccion, of ta traha como chef, of hardineria, etc, nan paña di trabao no ta seca lihe si ta laba nan den un wash mashin tradicional y laga nan seca pafo.
Tin casonan caminda un famia tin cu atende cu un familiar cu ta malo caminda tin cu laba paña tur dia y haci uzo di dryer cu ta traha a base di gas, ya cu mester corda cu tampoco por afford gastonan di coriente halto door di uza dryer of heater di coriente.
Den e casonan aki tin hende cu ta uza mashin di laba paña hunto cu su dryer cu ta traha cu gas. Pues, claro cu den e casonan aki e gasto di gas ta mas halto.
Esaki ta nifica cu na mundo y por supuesto sin laga Aruba afo, hasta e uso di gas a cambia su funcion. Antes, mayoria di cas tabata tin su baki pa frega frega y laba paña, y su wayanan pafo pa colga e pañanan.
Despues, e sociedad a cuminza moderniza y wash mashin a haci su entrada den e mercado di aparatonan electrico, y ta masha poco cas tin e bunita y util baki pa laba paña, entre otro. Y awendia, e mercado a sigui evoluciona y hopi consumidor ta uza e sistema di gas pa wash mashin y dryer tambe. Y tur esaki ta haci bida mas facil pero mas caro, entre otro e prijs di gas mes.
