Awe tin Open Dag na Universidad di Aruba cuminzando pa 6’or di atardi

Rector Sue-Ann Lee ta invita comunidad pa bishita U.A

ORANJESTAD (AAN) — Awe, Diahuebs 7 di Maart 2024, Universidad di Aruba ta habri su portanan un biaha mas, pa ofrece un “open house” cuminzando pa 6’or di atardi.

Ta bon conoci cu Universidad di Aruba ta brinda asina hopi opcion den diferente tereno,  cu si e studiante kier bay den e area di finanzas, marketing, Ley, Hospitalidad, Trabao Social, Maneho di Organizacion, etc., UA tin e opcionnan. Un invitacion pa wordo haci pa bishita e universidad y sera conoci cu e docentenan, studiantenan y programanan pa asina haya mas informacion riba loke UA por brinda bo y kico ta atrae abo, p’asina por join e famia di Universidad di Aruba.

            Mirando cu Aruba, un isla chikito, ta depende asina tanto di turismo, UA por yuda e studiante crece den e industria aki, den tur departamento. E Facultad di Turismo ta pone enfasis riba e diferente vaknan cu mester pa por maneha hopi bon un compania. Por ehemplo, den e areanan economico, marketing, Recursonan Humano, etc., Universidad ta yuda cu esey y e persona mes tin e oportunidad di crece den e Industria di Turismo, cuminzando for di abao te yega na un Nivel di Management.

            Sue Ann-Lee, Rector interino di U.A a duna di conoce cu e Universidad ta den un fase di transicion. Despues cu e director anterior a bay, su persona hunto cu otro colega a haya e encargo College van Curatoren si nan por a tuma e rol aki, ademas di ta Decano. Nan a tuma e rol di Rector Interino pa nan por sigui guia e organizacion na e momentonan aki, te ora nan haya un Rector nobo.

            E dama a indica cu muy pronto lo anuncia e vacature sea pa e apertura academico di e aña aki of e otro aña. Patrick Arens, Business Director a referi na e edificio nobo cu lo habri den e proximo lunanan, y cu Fondonan di Europeo pa Desaroyo, por amplia nan facilidadnan.

             For di fin di aña 2022 e edificio di Maria Convent a wordo duna na Universidad di Aruba y a firma un Bruikleen Overenkomst cu Gobierno pasobra e edificio ta di dje. E trabaonan ta den man di Albo y e ta den su ultimo simannan y oficialmente lo haya e edificio na fin di luna di Maart caba.