GEORGE TOWN: Como cu na comienzo di 2021 nan no por a celebra Carnaval na su forma completo cu semper e islanan ta conoci pe debi na e reglamentonan di pandemia,
awor porfin e organizadornan a haya luz berde pa organiza e evento carnavalesco riba cayanan. Porfin e bandanan musical a haya permiso pa subi caya, pues e evento ta cla pa tuma lugar awe Diasabra 7 di Augustus 2021 na Cayman Islands.
Nan a yama e evento CayMAS y e paradanan ta mustra di lo bay ta fenomenal.
Pero e biaha aki tin cierto reglamentonan cu e organizadornan tin di cumpli cune, segun regla di Ministerio di Salubridad Publico. Esey ta cu tur participante den e parada di awe mester ta completamente vacuna contra Covid-19, duna na e isla mes door di Health Services Authority, y nan no mag di interactua of acerca publico cu ta para na banda. Tambe Gobierno a bisa cu maximo 1.000 hende mag di ta den e un grupo.
Pa por acomoda tur hende cu a mustra interes di hopi tempo caba pa ta den parada, un di e directornan di CayMAS, esta Craig Frederick a bisa cu nan mester a busca un forma pa traha cu e plafond di 1.000 hende cu por subi caya y balia den e parada.
Segun Frederick, nan a separa esaki den dos grupo. Lo bay tin como 750 hende pa grupo, cu e prome seccion saliendo cu e Parada pa 12:30 pm for di e zona na altura di Paradise Bar & Grill, y e di dos seccion saliendo pa 12:40 pm for di e zona cerca di Eden Rock.
El a enfatiza tambe cu e Parada di awe Diasabra lo bay tin hopi diferencia compara cu e actividad di Carnaval di pasado, mustrando cu tur hende cu a registra mester tey na e punto di salida. Nan no por drenta e parada for di otro lugar a lo largo di e ruta.
Nan mester tin tur hende na comienzo, y esey tabata un di e reglanan cu CayMAS a bay di acuerdo cune pa asina por a tene e Parada.
E Parada lo bay ta awe Diasabra merdia, y despues e Soca Monarch competition y e AfterMas Foam Fete lo ta Diasabra anochi, y e ‘Tied Up’ boat party na Starfish Point lo ta riba Diadomingo.
E disfraznan ta cla, makeup ta cla, y Trucknan a wordo yena cu speaker pa asina trece ambiente riba caya.
E ruta lo hiba nan a lo largo di Seafarers Way, sigui pa North Church Street, y despues riba West Bay Road pasando e hotelnan, barnan, y restaurant te ora cu nan yega na Seven Mile Public Beach. Den pasado e fiesta lo sigui eynan mes. Pero e biaha aki, Gobierno a duna ordo pa e dos gruponan di parada dividi y separa aki di otro.
Na e Soca Monarch competition lo acepta 1.000 hende so den publico (no ta necesario pa ta vacuna), y nan mester a cumpra ticket online adelanta.
Polis lo cera e ruta di trempan, y publico por bay para banda di caminda pa mira y apoya e participantenan.
Pa 6:00 pm porta ta habri pa e Soca Monarch competition na Coral Beach, y e evento lo start pa 7:00 pm. Cuatro top cantante di Cayman Islands lo competi pa e corona y e $8.000 na cash y premio. E cantantenan cu ta competi ta Andy Blake, Mona Lisa, James Geary, y Erica Assai. Nan lo trece energia riba escenario pero solamente uno por sali victorioso.
E AfterMas Foam Fete lo ta cu e mihor DJ di Soca cu lo keda toca te 11:59 pm. Pa 12:00 am tur cos mester keda cla.
Segun Craig Frederick mihor conoci como ‘Festa’ a bisa: “Nos ta e unico isla den Caribe cu ta bay organiza Carnaval pa 2021 awor, y nos mester ta hopi orguyoso di esey. Si, tin algun regla cu tin di cumpli cune, pero nos no mester bisti tapaboca ni mantene distancia social. Pues tin hopi pa ta agradecido pa esey. Nos ta cla pa hit de road!”
VACUNA: E isla di Cayman Islands keto bay oficialmente ta cera pa turista. Ningun no mag di drenta ni via avion, ni barco crusero. Tur e tempo aki, Gobierno di e isla a percura pa usa e isolacion aki pa reduci Coronavirus riba e isla. Te cu Diahuebs anochi, como 50.308 persona (71%) di e poblacion a ricibi e prome dosis di vacuna, y 48.111 (68%) a wordo vacuna completamente. Durante henter e pandemia aki, solamente 2 hende a muri di Covid na e isla aki.
Esnan cu kier mira mas di e Carnaval di Diasabra 7 Augustus, por check e Instagram: @caymas.ky pa mira potretnan.
