ORANJESTAD (AAN): Cada 21 di november ta celebra Dia Mundial di Television,
un fecha pa reconoce e influencia grandi cu e medio aki tawata y tin riba cultura, comunicacion y bida di tur dia. Un dia manera awe, por trece hopi recuerdo di un epoca caminda television tabata hopi mas cu un pantaya. Television tabata loke a uni famianan sinta hunto den sala di cas y disfruta di programanan cu a habri bentana pa mira mundo.
Hopi ciudadano di Aruba ainda ta corda e tempo prome cu cable y internet, caminda, pa por haya un miho señal, mester draai e antena manualmente. E trabou aki mas tanto tawata pa e muchanan di cas mientras cu den sala otro ta grita: “Un tiki mas na banda robes!”. “Un tiki mas na man drechi. “Awo e ta bon, no mov’e!”. E esfuerso familiar aki tabata parti di rutina televisivo, mas tanto ora kier coy señal internacional.
Entre esnan cu tabata forma parti di nos entretenimento tabata Radio Caracas Televisión (RCTV) y Venevisión, dos canal venezolano cu tabata yega na Aruba via señal habri. Nan telenovela, programa di concurso y noticia tabata parti di nos bida diario y a keda graba den e imaginacion cultural di hopi hende.
Hunto cu e canalnan internacional, semper tabata tin TeleAruba, nos canal nacional cu ainda ta brinda nos informacion y entretenimento. TeleAruba tawatin un rol importante den preserva nos identidad cultural y transmiti noticia local.
Awe, Dia Mundial di Television, no solamente ta celebra e desaroyo tecnologico, sino tambe e recuerdonan di un tempo caminda tur imagen cu nos logra sintonisa tabata un triunfo chikito y un bentana habri pa mundo.
