Awe ta cumpli 33 aña di e show na radio Oldies 99.9

Joe Hernandez y Tico Bee na Galactica FM

ORANJESTAD (AAN): E siman aki tabatin un celebracion na sede di emisora Galactica 99.9 FM, ora cu a festeha e hecho cu e programa ‘Oldies 99.9’ ta celebra 33 aña di existencia.

   Joe Hernandez cu Tico Bee Oldies a start riba un dia manera awe 33 aña pasa cu e programa musical aki.  E programa ta cumpli su aniversario awe Diabierna 25 October.

   Tempo cu e programa Oldies 99.9 a cumpli su di dos lustro, e dos presentadornan a start cu un ‘Marathon di Oldies’ cu ta cay den e mesun siman aki di October, pa recorda e fecha cu e programa aki a cuminza.  Ainda nan ta sigui cu e Marathon aki, y e ta cuadra semper den siman di 25 di October.

   Programa a start na 1991 ora cu Galactica FM a bay den aire.  Tabatin un otro persona cu e show prome, esta e conocido Adeline Geerman.  E programa despues a ser traspasa pa Joe Hernandez cu a sigui cune.  Tico Bee a uni tambe, y asina e programa a keda pasa tur Diadomingo anochi di 5:00 pm pa 7:00 pm.  Despues a prolonga e show cu 60 minuut mas.

   Den e show algo cu ta atrae hopi hende, ta e segmento produci pa Tico Bee cu yama “Con el a sona awe, con el a sona ayera”.  Aki e ta toca musica cu ta conoci actualmente, y e ta busca e cancionnan ‘original’ y diferente version cu a ser saca atravez di añanan, y e ta toca nan tur.  Pa asina bo sa con cada temporada e mesun cancion a sona diferente.  Oldies 99.9 a indica cu nan lo sigui cu e seccion ey, pa asina duna relato di e storia tras di cada cancion.  Aki Tico Bee ta purba di suministra e detaye aki.

   Joe Hernandes su nomber di berdad ta Maikel J. Oduber, y el a indica cu dia 3 di November venidero nan lo bay tin un Marathon special di 12 ora largo, unda nan lo bay dedica esaki exclusivamente na e cantantenan cu a fayece, tanto local y internacional.  Esaki combina cu informacion extra di cada cantante, nan historia, y motibo di fayecimento.  Esaki ta algo cu Oldies 99.9 ta sigui lucha pe.

   Tico Bee a indica cu den 33 aña di existencia di e programa, solamente 2 biaha so nan a keda sin duna show riba Diadomingo.  Un biaha tabata pa motibo di malesa.  E otro biaha tabata debi cu tin Carnaval Grandi.  Pero e siguiente aña a dicidi cu como cu no ta pasa Oldies riba Diadomingo di Carnaval, e ora nan lo transmiti esaki riba Dialuna despues di Carnaval.

   Tico Bee a splica cu pa fin di November, nan lo tin un show riba un Diadomingo cu lo ta dedica na “Un Diadomingo bek den 1960”, “Un Diadomingo bek den 1970”, y “Un Diadomingo bek den 1980”.  Dia 24 di November nan lo tin “Un Diadomingo bek den 1990”.

   Dia 22 di December 2024, Oldies 99.9 lo bay pasa e Top 100 di cancionnan na idioma spaño so.

   Kico lo tin na 2025, segun Tico Bee ta cu dia 18 di Maart nan lo tin un show dedica na: “Di Fiesta cu nos Bandanan Local”, cu ta bay resona cancionnan local di antes, y lo tin hopi musica di bandanan musical di Aruba.

   Lo tin hopi programa mas prepara pa otro aña, y tin biaha e 3 ora di show ta demasiado cortico.  Aki Joe Hernandes a admiti cu nan ta pensando di hisa e show cu 60 minuut extra pa e bira 4 ora largo pa por acomoda tur cancion cu nan tin.