ORANJESTAD (AAN): Pueblo tin di corda, cu e fecha di 21 di Februari di tur aña ta Dia Internacional di Lenga Materno.
Segun proclamacion di: The United Nation Education and Scientific Cultural Organization, (UNESCO).
Dia di Lenga Materno ta netamente pa stimula bon uzo di nos dushi idioma Papiamento den nos comunidad y stimula publicacionnan bou di nos escritornan local.
Den sentido general ta considera idioma, como e medio unificador di mas importante di un cultura. Idioma ta carga tur pensamento y experiencia humano, cultura y identidad. Idioma ta transferi cultura.
Papiamento na Aruba ta wordo pusha como un punto importante den su educacion cultural. Como cu ortografia tambe ta un simbolo sumamente importante, cu ta muestra di un propio identidad. Mester mustra cu e oficialisacion por crea aprecio y stimula nos pa, cu orguyo y amor, siña nos hendenan conoce e historia di nos idioma materno bon y promove e uzo corecto di papi’e y skirbie (papia- y skirbimento).
Durante e desaroyo di nos idioma materno Papiamento ta keda enfoca riba su retonan pa educa, promove, cuida y hacie mas conoci pa e bon uzo di nos Papiamento pa generacionnan cu ta bini.
Fundacion Lanta Papiamento, (FLP), tambe ta un organizacion cu a ser institui pa preserva y salvaguardia e bon uzo di Papiamento. DCA bou auspicio di ministerio di Cultura ta keda enfoca riba educa, promove, cuida y e bon uzo di nos Papiamento pa generacionnan cu ta bin.
