ORANJESTAD (AAN) – Minister Presidente Evelyn Wever Croes, a duna di conoce den entrevista cu DIARIO, cu despues di e presentacion cu e tin cu DIP awe,
y yegando fin di aña, e lo duna un presentacion pa comunidad en general, tocante kico tur a tuma lugar e aña aki y kico ta e plannan pa otro aña, pa asina hende haya un idea di con avanza Aruba ta.
Tocante locual el a menciona cu gobierno no ta hayando hurista pa e departamentonan cu tin falta di nan, un aspecto ta e salario. Nan ta haya hopi miho salario den sector priva cu loke gobierno ta ofrece. Otro punto ta cu no tin hopi flexibilidad den gobierno. Hopi biaha nan ta bezig ta revisa e structura di salario.
“Nos ta yega na conclusion cu e profesionalnan aki (hurista) ta gana menos den gobierno cu nan ta gana den sector priva, y tin menos posibilidad pa crece. E otro aspecto ta cu no tin flexibilidad den gobierno. Bo ta haya e hendenan cu a caba di studia, nan tin famia jong, yiunan chikito, ora e yiu ta bira malo e tin cu keda cas, of bo tin cu hiba yiu na futbol, ballet, etc., door cu no tin flexibilidad y bo ta haya e profesionalnan hoben aki, cu ta prefera di pone atencion na kico ta importante pa nan yiunan, nan ta tuma retiro di gobierno. Pues, riba e dos aspectonan aki nos tin cu traha riba nan.
Claro, e peso di trabao den gobierno no ta facil, e volumen ta hopi, tin hopi atraso y otro problemanan; por ehemplo DIP cu tur e investigacionnan cu tin, hende ta core leu, nan no kier yega eybanda mes pa no haya nan mes den problema. Kiermen tin diferente factor cu nos kier traha riba nan, pa nos atrae nos profesionalnan”, Minister Presidente a señala.
