Awe Diasabra anochi tin Aruba Showcase Event II na Plaza Comercio

Publico ta invita pa atende

ORANJESTAD (AAN): E lo ta grandi awe na Playa!  E asina yama ‘Aruba Showcase Event II’ lo ta awenochi na Plaza Comercio.  Esaki ta net diagonal di El Gaucho Restaurant na cruzada di Columbusstraat y Wilhelminastraat.

   E evento aki ta un oportunidad unico pa bin celebra e talento local di Aruba, cu un variedad amplio di productonan di calidad halto y unico. E Aruba Showcase Event II lo presenta productonan local, creativo y original, manera pica Arubano, cosmetica natural, chuculati, arte, moda sostenibel y mas.

   E ta un evento familiar y tur hende di Aruba ta keda cordialmente invita pa explora y bin cumpra e productonan autentico di nos isla, mientras bo ta apoya y sostene nos empresarionan local.

   E evento awe lo ta di 6:30 pm te cu 9:00 pm na Plaza Comercio, pariba di ex-Parkinglot di Brenchie’s Hardware.  Entrada lo ta gratis.

   E banda di ‘NFuzion’ lo ta presente pa anima e publico y crea un ambiente festivo.

   Departamento di Asuntonan Economico, Comercio y Industria mediante su unidad Exprodesk, ta busca constantemente oportunidadnan pa nos empresarionan local expone y bende nan productonan y servicio. Nos ta compromete na sostene y desaroya nos economia, door di sostene nos empresarionan chikito y mediano, y asina apoya nos comunidad comercial.

   Nan ta invita mas empresario local pa haci uzo di e oportunidad pa exhibi nan productonan riba e Webpage Aruba Showcase, cu lo amplia e alcance di nan producto globalmente. E plataforma ta un gran oportunidad pa expone productonan di Aruba riba mercado mundial.

   Nan ta invita e comunidad di Aruba riba Plaza Comercio diasabra awor, pa sostene nos empresarionan local y cumpra productonan autentico di Aruba.

Ban Cumpra Local y Sostene nos Hendenan.