Awa di yobida excesivo cu no por a wordo contene na Bubali Plas a causa cu awa di lama a bira bruin

DOW ta informa

*no ta awa cu ta bin di riolering manera a wordo insinua den medionan social

ORANJESTAD (AAN): Diahuebs alrededor di 1’or di merdia a cuminsa yobe na un manera intensivo. Departamento di Obra Publico (DOW) a ricibi informacion for di CMO cu a yobe entre 25-38mm di awa den 45 minuut. Esaki ta uno sumamente hopi fuerte y fuera di lo normal.

DOW a tuma nota di un noticia cu ta circula riba medionan social cu awa ta saliendo for di e canal for di Bubali Plas y ta haci e lama bruin y nan kier informa comunidad di Aruba relaciona cu algun punto importante cu ta relata na yobida intensivo.

Ora cu tin yobida asina hopi y intensivo, e rooinan ta cuminsa core pa hiba awa lama y ta drenta lama na e uitmondingnan (boca) cu tin na Arashi, Ritz Carlton, Eagle Beach, Bubali, Tamarijn, Waf, Sun Plaza y otro lugarnan. Ora e rooinan cuminsa core e ta colecta tur sedimento (lodo) riba tera y awa ta haya e color bruin. Na momento cu e awa drenta lama esaki ta causa cu awa di lama localmente ta bira bruin y despues di algun dia e awa di lama ta clarea y bira normal.  E evento nan aki ora di yobida na e uitmondingnan ta un proceso natural cu ta tuma lugar pa añanan caba.

   E yobida grandi durante e dia di diahuebs a causa inundacion nan den area di Noord y Tanki Leendert, Tanki Flip, Pos Abao, Palm Beach, San Miguel y vecindario. E infrastructura di drenahe manera ta organisa a cuminsa transporta e awa pa e area di Eagle, Bubali y saliña dilanti di Ritz Carlton.  Via di e saliña di Bubali Plas ta bay over na e sluis pa asina e awa di yobida yega su destino cu ta lama. Ta subraya cu e awa cu ta bayendo lama ta awa di yobida den exceso cu no por wordo contene den Bubali Plas y no ta awa cu ta bin di riolering manera ta wordo insinua den medionan social. E awa aki un combinacion di awa di yobida y awa procesa.

    Por ultimo DOW ta bezig ta monitor tur e uitmonding nan y nos infrastructura di caminda pa por restablece nos actividad nan normal.