Pa evita cualkier colision cu avionnan militar
ORANJESTAD (AAN): Awor a yega na un acuerdo entre Southern Command di Forza Aereo Mericano, y e instancia cu ta reglamenta Espacio Aereo pa Caribe Hulandes, pa evita cualkier encuentro inespera durante vuelo ora cu avionnan militar ta cruza corridor aereo di Aerolineanan.
Sinembargo algun dia pasa, tabatin e famoso caso di e vuelo di jetBlue panort di Curaçao, y tambe e avion priva Falcon 900EX bulando panort di Aruba. Ambos casi a haya nan den un posibel colision cu un avion militar Mericano bulando sin nan transponder cendi, pues ta danki na wowo di e pilotonan a logra desvia pa evita di dal den nan.
Awor a sali na cla tambe, cu riba Diahuebs 11 di December 2025, un avion Airbus A330-200 di KLM cu a sali for di Bonaire rumbo pa Amsterdam, a bin topa cu un otro avion militar bulando hopi cerca di nan.
Esaki a socede como 75 miya panort di Bonaire. Mesora e tripulacion a rapporta na Curaçao Radio Control cu nan a bin desvia pa un avion militar bulando hopi cerca di nan.
E Controlador di Curaçao Radio a contesta nan cu e avion ey no ta identifica, pero pa casualidad net e ora ey a aparece riba pantaya, capta pa nan Primary-Radar. Pilotonan a bisa cu nan no a detecta e otro avion ey riba nan sistema TCAS cu ta funciona a base di transponder, y cu ta alerta nan na tempo si acaso nan ta apunto di dal den otro avion.
E pilotonan di KLM riba vuelo KL-765 a indica cu e avion militar e momento ey tabata bulando na como 25.000 pia halto.
Medida nobo: A base di e NOTAM pa Lama Caribe unda FAA di Merca ta pidi pilotonan di aviacion civil pa nan keda alerto ora di bula riba e region ey, esey ta algo cu ta facil pa mira den dia cla. Pero anochi e ta bira dificil, specialmente ora cu tene na cuenta cu varios vuelo di KLM ta sali ora cu ya caba solo ta bahando.
A base di esey, KLM a tuma decision na Hulanda cu tur vuelo di nan pa islanan ABC den Lama Caribe, e personal di cockpit tin di cuminza tuma e medidanan nobo aki. Aunke durante vuelo nan mester djis tin e navigation lights pafo cendi (luznan cu ta cende-paga), toch awor KLM a opta pa nan tin extra iluminacion.
E medidanan aki ta introduci iluminacion adicional, pa asina e avionnan aki ta mas visibel den e region aki, specialmente debi na actividad militar den espacio aereo. KLM a splica cu e decision aki ta djis un sorto di precaucion y dirigi na mehora visibilidad, special ora di bula anochi.
Esaki hunto cu e anuncio recien di Southern Command di US Air Force cu nan lo evita di bula den corridor aereo, y cuminza coordina mihor nan pasamento, lo bay yuda pilotonan di avionnan militar detecta ora cu tin un avion grandi di aerolinea bulando den nan area. Debi cu e avionnan aki lo tin luznan full cendi.
No ta conoci si acaso KLM lo laga otro vuelonan internacional (bulando pa e.o. Colombia, Ecuador, Peru) cu tambe ta pasa den region di Lama Caribe bula tambe cu luznan cendi, of si acaso lo ta valido pa vuelonan cu a lanta for di Aruba, Bonaire, of Curaçao so.
