Avion priva por poco a dal den avion militar panort di Aruba

Diabierna tabata jetBlue bulando panort di Curaçao

• Avionnan militar bulando sin nan transponder cendi
• jetBlue a haci denuncia na autoridad Federal na Merca 

ORANJESTAD (AAN): Den fin di siman, ta dos caso serio di casi “mid-air collision” a wordo raporta riba Lama Caribe, den e zona di espacio aereo controla pa Curaçao Control, y cu no tin nada di haber cu e espacio aereo Venezolano riba cual tin un NOTAM emiti door di FAA di Merca.

   Caso di Diabierna: Un piloto di jetBlue Airways a bisa cu el a logra evita na tempo di “dal den pleno vuelo” cu un avion militar Mericano cu a cruza drenta den su trayectoria di vuelo, mientras cu e Airbus A320 di jetBlue tabata subiendo keto bay despues di a sali for di Aeropuerto di Curaçao riba Diabierna 12 di December 2025.  Esaki segun e aerolinea mes a confirma, y segun por a sigui grabacionnan di Curaçao Air Traffic Control.

   Y esaki a socede riba espacio aereo di islanan ABC, e no a socede riba espacio aereo Venezolano.

   jetBlue su vuelo B6-1112 a lanta vuelo pa 4:38 pm for di Aeropuerto di Curaçao, y casi mesora a bira direccion panort pa bula rumbo pa JFK Airport na New York City.  Curaçao ATC a dune permiso pa subi te na 35.000 pia.  Sinembargo prome cu el a yega eynan, diripiente wowo di e pilotonan a mira un avion cruzando nan dilanti.  E tabata como 5 miya leu di nan, pero mirando e hecho cu avionnan aki ta bulando hopi rapido, e distancia ey ta hopi espantoso, pasobra den frega di wowo ta yega cerca.

   E capitan a haye ta core baha nanishi di su avion, pa asina evita cu nan ta bay dal den e avion.  Poco despues mesora el a drenta den contacto cu Curaçao ATC y informa nan cu nan mester a stop nan subida, ora cu un avion KC46 Air-Tanker (cu ta suministra gasolin durante vuelo na jetnan) di US Air Force a cruza nan trayectoria di vuelo y tabata bulando na mesun altura cu nan.

   E piloto a bisa cu e avion militar tabata bayendo Noordoost rumbo pa espacio aereo Venezolano.  Curaçao ATC a informa cu nan no a detecta nada di e avion militar ey.  Capitan di jetBlue a indica cu e avion militar no tabatin su transponder cendi tampoco, cu por a duna nan alerta mas trempan.

   “Casi no tabatin un colision den aire aki riba,” e piloto a bisa segun grabacion di ATC.  “Nan a pasa directamente den nos trayectoria di vuelo.... Nan no tin e transponder cendi, esaki ta indignante”.

   jetBlue mientras tanto a confirma cu nan a raporta e incidente na Autoridadnan Federal na Merca, y lo participa den cualkier investigacion.

  Caso di Diasabra: Tabata Diasabra 13 di December 2025 den oranan di mainta, cu un avion priva modelo Dassault Falcon 900 EX cu tres motor, a sali for di Aruba, y pariba di Jamanota esaki a tuma rumbo panort.  Varios minuut despues di ta den aire, e pilotonan aki tambe a core actua ora cu a bin descubri un avion militar cruzando nan trayectoria di vuelo.  E avion priva aki a core bira na su man drechi, pa asina evita di ta bay dal den otro avion.

   Mesora e pilotonan aki di Falcon 900 a core raporta loke nan a pasa aden, splicando cu nan a pasa hopi cerca mes di un avion militar Mericano grandi.  Aki nan tambe ta describi esaki como un KC46 Air-Tanker di US Air Force.  Nan a haya nan obliga di coregi nan curso pa evita un boksmento, y a core raporta esaki.  Pero mescos cu un dia prome, ATC no tabatin ningun indicacion cu tin avion militar bulando den nan area, como cu transponder tambe ta paga.

   Ta asina cu un NOTAM di FAA ta valido aworaki pa e espacio aereo di Venezuela, y tambe esnan den cercania (incluyendo espacio aereo di Aruba, Curaçao, y Bonaire) te cu fin di e luna aki, cu ta conseha pilotonan pa nan bula cu “cautela extremo”.