Avion di WestJet a haci aterizahe di emergencia na St. Maarten

Tres pasahero a resulta herida

ORANJESTAD (AAN): Informacion for di St. Maarten ta indica cu Diadomingo merdia un emergencia a wordo raporta abordo di un Boeing 737-800 di e aerolinea WestJet di Canada, cu tabata bulando vuelo WS-2276 for di Toronto pa St. Maarten.

   A raporta cu durante e aterizahe, un di e halanan di e avion a dip demasiado abao, y esaki a dal y raspa contra e pista di aterizahe.  Esaki a produci hopi huma.

   E momento ey tabatin 164 persona total abordo, y debi na esaki e capitan a para e avion mey-mey di e pista, y a duna ordo di “evacuate – evacuate” na personal di cabina.  Mesora nan a habri porta y slides a sali.

   Pasaheronan e ora mester a bula y evacua for di e avion.  Toren di Control a activa Groot Alarm, y Bomberonan como tambe Ambulance a yega na Aeropuerto.  Finalmente a resulta cu no tabatin candela.

   E evacuacion a bay bon, pero toch tres pasahero a haya golpi na nan curpa ora cu nan a bula for di slides.  Personal medico a dicidi pa bay cu nan pa Hospital pa evaluacion medico.  Bomberonan na final a detecta cu no tin candela, y ta djis huma a bolter pero nada mas a mira na e hala banda drechi di e avion.

   Toren di Control a cera pista, y ningun avion mas por a ni subi of baha.  Vuelonan cu tabata yegando, a desvia pa Aeropuertonan alternativo.  Vuelonan cu tin di subi, a wordo posponi.

   Tur personal extra di Aeropuerto a yega, incluyendo oficialnan di Aviacion Civil.  Tin indicacion cu e avion lo no subi bek pa vuelo di regreso, como cu e tin di wordo revisa completo y haya keuring prome cu e por bula atrobe.