PORLAMAR: E vuelo di aerolinea Conviasa for di Maiquetia pa Aeropuerto di Isla di Margarita a ateriza di emergencia na e isla.
Esey a socede despues di 90 minuut cu e pasaheronan a keda bula rond mientras cu tabata gasta mas jetfuel, pa asina ora di haci e aterizahe tin menos peligro pa candela of explosion.
E vuelo cu mester a sali Diamars mainta 9:00 am for di Maiquetia, finalmente a sali te 9:20 am. E ta un avion Embraer ERJ-190 cu matricula YV-2953 cu 104 persona abordo.
Pero net cu nan ta casi ateriza, e pasaheronan a nota cu e piloto no a sigui pa baha e avion, sino a keda bula. Despues a informa e pasaheronan cu tin problema cu e tren di aterizahe. Esta cu e wielnan no ta sali completo, pues tin chens cu ora di ateriza e wielnan lo no por wanta e peso di avion. E indicador no ta mustra cu e wiel a baha y ta den posicion locked.
Pesey a dicidi na pasa algun biaha abao riba e Aeropuerto pa asina esnan di Toren via binocular por a check si e wielnan a sali of no. Nan tabata mira e wielnan afo, pero no sa si nan ta locked.
Asina pues e avion a keda bula rond pa como 90 minuut extra pa kima mayoria di jetfuel. Esey pa e avion no kima si acaso ora di ateriza esaki bay malo.
E avion finalmente a ateriza despues sin ningun problema, y Bomberonan tabata riba standby. E pasaheronan si a tuma tur precaucion paden y a hasta sak nan curpa den nan asiento pa un aterizahe di emergencia.